phuTi bhali wo aankh jo aansu se tar nahin

phūTī bhalī vo aañkh jo aañsū se tar nahīñ

kis kaam hai vo siip ki jis meñ guhar nahīñ

mun.im hai kyā ki jis se koī bahra-var nahīñ

kis kaam kā vo naḳhl ki jis meñ samar nahīñ

banda huuñ be-ḳhudī kā maiñ us mast kī jise

āshob-e-roz-e-hashr se aslan ḳhabar nahīñ

yā-rab ḳhalish se aah kī ho jo na bahra-mand

jis dil kā takiya-gāh sar-e-neshtar nahīñ

ai dil ba-rañg-e-ġhuncha na mil gul-ruḳhoñ se tū

apnī girah meñ un ke khilāne ko zar nahīñ

saaqī hai shab kī dast-darāzī kā kyā gila

pyāre jo be-ḳhudī meñ huā mo'tabar nahīñ

nālāñ na huuñ galī meñ tirī maiñ to kyā karūñ

murġh-e-chaman meñ naala sivā kuchh hunar nahīñ

joñ ashk ek laġhzish-e-pā meñ ga.e haiñ paar

hastī se tā-ba-nīstī chandāñ safar nahīñ

'qā.em' jo is tarah tū phire hai ḳharāb-o-ḳhvār

ai ḳhānumāñ-ḳharāb magar tere ghar nahīñ

phuTi bhali wo aankh jo aansu se tar nahin

kis kaam hai wo sip ki jis mein guhar nahin

munim hai kya ki jis se koi bahra-war nahin

kis kaam ka wo naKHl ki jis mein samar nahin

banda hun be-KHudi ka main us mast ki jise

aashob-e-roz-e-hashr se aslan KHabar nahin

ya-rab KHalish se aah ki ho jo na bahra-mand

jis dil ka takiya-gah sar-e-neshtar nahin

ai dil ba-rang-e-ghuncha na mil gul-ruKHon se tu

apni girah mein un ke khilane ko zar nahin

saqi hai shab ki dast-daraazi ka kya gila

pyare jo be-KHudi mein hua mo'tabar nahin

nalan na hun gali mein teri main to kya karun

murgh-e-chaman mein nala siwa kuchh hunar nahin

jon ashk ek laghzish-e-pa mein gae hain par

hasti se ta-ba-nisti chandan safar nahin

'qaem' jo is tarah tu phire hai KHarab-o-KHwar

ai KHanuman-KHarab magar tere ghar nahin