pi humne bahut sharab tauba

pī ham ne bahut sharāb tauba

ai garmī-e-āftāb tauba

aalam kā ye inqalāb tauba

zarre hue āftāb tauba

jis vaqt tasalliyāñ koī de

us vaqt kā iztirāb tauba

āñkheñ jinheñ dekh kar hoñ bīmār

vo nargis-e-nīm-ḳhvāb tauba

kyā mastāna har adā hai

kis josh pe hai shabāb tauba

kar dūñgā hazār maiñ unheñ band

bātoñ kā mirī javāb tauba

har roz hī ik nayā sitam hai

har vaqt hai ik itaab tauba

saaqī tire daur meñ kisī kī

hotī bhī hai mustajāb tauba

āñkheñ shab-e-vasl bhī jhukī haiñ

ḳhalvat meñ bhī ye hijāb tauba

kartā hai sharāb mohtasib band

ye bhī hai koī savāb tauba

piirī meñ 'hafīz' mai-parastī

ab kījiye ai janāb tauba

pi hum ne bahut sharab tauba

ai garmi-e-aftab tauba

aalam ka ye inqalab tauba

zarre hue aaftab tauba

jis waqt tasalliyan koi de

us waqt ka iztirab tauba

aankhen jinhen dekh kar hon bimar

wo nargis-e-nim-KHwab tauba

kya mastana har ada hai

kis josh pe hai shabab tauba

kar dunga hazar main unhen band

baaton ka meri jawab tauba

har roz hi ek naya sitam hai

har waqt hai ek itab tauba

saqi tere daur mein kisi ki

hoti bhi hai mustajab tauba

aankhen shab-e-wasl bhi jhuki hain

KHalwat mein bhi ye hijab tauba

karta hai sharab mohtasib band

ye bhi hai koi sawab tauba

piri mein 'hafiz' mai-parasti

ab kijiye ai janab tauba