pi raha hai zindagi ki dhup kitne pyar se

pī rahā hai zindagī kī dhuup kitne pyaar se

duur jo baiThā huā hai sāya-e-dīvār se

gosha-e-dil kī ḳhamoshī ghar meñ bhī miltī nahīñ

ghar ke hañgāme bhī kam hote nahīñ bāzār se

sochte kyā ho mire ghar meñ diyā koī nahīñ

raushnī to aa rahī hai rauzan-e-dīvār se

zindagī ke har qadam meñ vaqt kī raftār hai

zindagī ko nāpnā kyā vaqt kyā raftār se

manzil-e-shahr-e-tamannā shāyad ab nazdīk hai

kyuuñ nazar aane lage haiñ rāste dushvār se

kis qadar ḳhuddār the do paañv ke chhāle na pūchh

koī sargoshī na kī zanjīr kī jhankār se

dukh meñ jab 'shabnam' use dekhā to andāza huā

phuul kī pattī bhī kam hotī nahīñ talvār se

pi raha hai zindagi ki dhup kitne pyar se

dur jo baiTha hua hai saya-e-diwar se

gosha-e-dil ki KHamoshi ghar mein bhi milti nahin

ghar ke hangame bhi kam hote nahin bazar se

sochte kya ho mere ghar mein diya koi nahin

raushni to aa rahi hai rauzan-e-diwar se

zindagi ke har qadam mein waqt ki raftar hai

zindagi ko napna kya waqt kya raftar se

manzil-e-shahr-e-tamanna shayad ab nazdik hai

kyun nazar aane lage hain raste dushwar se

kis qadar KHuddar the do panw ke chhaale na puchh

koi sargoshi na ki zanjir ki jhankar se

dukh mein jab 'shabnam' use dekha to andaza hua

phul ki patti bhi kam hoti nahin talwar se