پینے لگے شراب بھی کرنے کو غم غلط

پینے لگے شراب بھی کرنے کو غم غلط

جو بات کی ولیؔ وہ خدا کی قسم غلط

فکر جہاں میں جان جلانا فضول بات

عشق بتاں میں سوز دل و چشم نم غلط

کب منزل سکوں سے وہ ہو پائے آشنا

اٹھیں رہ حیات میں جس کے قدم غلط

دنیا کی بھی نظر میں غلط ہو وہ کیا ضرور

ہر ایسی بات جس کو سمجھتے ہوں ہم غلط

صیاد خود قفس کو کیا ہم نے اختیار

ہم آئے تیرے جال میں یہ یک قلم غلط

اجڑے چمن پہ دام کو ترجیح ہم نے دی

ہم آئے تیرے دم میں غلط ایک دم غلط

آتا نہیں لبوں پہ سخن غور کے بغیر

منہ سے ہمارے بات نکلتی ہے کم غلط

ہونٹوں پہ آ سکی نہ کبھی اپنے جھوٹ بات

تحریر کر سکا نہ ہمارا قلم غلط

جب کچھ نہیں خدا کے سوا پھر تو اے حکیم

ساری یہ تیری بحث وجود و عدم غلط

ہے مقتضا فطرت انسان تبصرہ

بد نیتی کے تحت مگر مدح و ذم غلط

ساقی کی بے رخی پہ ولیؔ اتنا شور و شین

اتنی ذرا سی بات پہ اتنا ادھم غلط