pine lage sharab bhi karne ko gham ghalat

piine lage sharāb bhī karne ko ġham ġhalat

jo baat kī 'valī' vo ḳhudā kī qasam ġhalat

fikr-e-jahāñ meñ jaan jalānā fuzūl baat

ishq-e-butāñ meñ soz-e-dil o chashm-e-nam ġhalat

kab manzil-e-sukūñ se vo ho paa.e āshnā

uTTheñ rah-e-hayāt meñ jis ke qadam ġhalat

duniyā kī bhī nazar meñ ġhalat ho vo kyā zarūr

har aisī baat jis ko samajhte hoñ ham ġhalat

sayyād ḳhud qafas ko kiyā ham ne iḳhtiyār

ham aa.e tere jaal meñ ye yak-qalam ġhalat

ujḌe chaman pe daam ko tarjīh ham ne dī

ham aa.e tere dam meñ ġhalat ek dam ġhalat

aatā nahīñ laboñ pe suḳhan ġhaur ke baġhair

muñh se hamāre baat nikaltī hai kam ġhalat

hoñToñ pe aa sakī na kabhī apne jhuuT baat

tahrīr kar sakā na hamārā qalam ġhalat

jab kuchh nahīñ ḳhudā ke sivā phir to ai hakīm

saarī ye terī bahs-e-vajūd-o-adam ġhalat

hai muqtazā-e-fitrat-e-insān tabsira

bad-niyyatī ke teht magar madh-o-zam ġhalat

saaqī kī be-ruḳhī pe 'valī' itnā shor-o-shīn

itnī zarā sī baat pe itnā udham ġhalat

pine lage sharab bhi karne ko gham ghalat

jo baat ki 'wali' wo KHuda ki qasam ghalat

fikr-e-jahan mein jaan jalana fuzul baat

ishq-e-butan mein soz-e-dil o chashm-e-nam ghalat

kab manzil-e-sukun se wo ho pae aashna

uTThen rah-e-hayat mein jis ke qadam ghalat

duniya ki bhi nazar mein ghalat ho wo kya zarur

har aisi baat jis ko samajhte hon hum ghalat

sayyaad KHud qafas ko kiya hum ne iKHtiyar

hum aae tere jal mein ye yak-qalam ghalat

ujDe chaman pe dam ko tarjih hum ne di

hum aae tere dam mein ghalat ek dam ghalat

aata nahin labon pe suKHan ghaur ke baghair

munh se hamare baat nikalti hai kam ghalat

honTon pe aa saki na kabhi apne jhuT baat

tahrir kar saka na hamara qalam ghalat

jab kuchh nahin KHuda ke siwa phir to ai hakim

sari ye teri bahs-e-wajud-o-adam ghalat

hai muqtaza-e-fitrat-e-insan tabsira

bad-niyyati ke teht magar madh-o-zam ghalat

saqi ki be-ruKHi pe 'wali' itna shor-o-shin

itni zara si baat pe itna udham ghalat