piri mein dil shabab ka KHwahan kahan raha

piirī meñ dil shabāb kā ḳhvāhāñ kahāñ rahā

iflās meñ uruuj kā armāñ kahāñ rahā

sajda kiyā butoñ ko to īmāñ kahāñ rahā

ai banda-e-ḳhudā tū musalmāñ kahāñ rahā

a.amāl-e-bad pe apne jo royā dam-e-fanā

merā siyāh nāma-e-isyāñ kahāñ rahā

mansūr ne kahā jo anal-haq huā na zabt

sab raaz faash ho gayā pinhāñ kahāñ rahā

rindoñ ko piiTh pīchhe burā kah rahā hai tū

vaa.iz mujhe batā tū musalmāñ kahāñ rahā

raftār-e-yār dekh ke nādim huā kahāñ

kabk-e-darī chaman meñ ḳhirāmāñ kahāñ rahā

un se ziyā-e-chehra-e-jānāñ jo dekh le

tābinda charḳh par mah-e-tābāñ kahāñ rahā

allah re zor-e-dast-e-junūñ kā bahār meñ

sālim har ek tār-e-garebāñ kahāñ rahā

fasl-e-bahār meñ thā ye mere junūñ kā zor

dāman kahāñ rahā hai garebāñ kahāñ rahā

niklī jo ruuh jism se begāna ho ga.ī

thā jo ki ittihād-e-tan-o-jāñ kahāñ rahā

sunte hī aib aur hunar us kā dekh le

aisī sifat kā koī suḳhan-dāñ kahāñ rahā

muusā ko tuur par jo tajallī nazar paḌī

vāraftagī meñ hosh kā sāmāñ kahāñ rahā

nazzāra roz kartā thā rū-e-nigār kā

poshīda merī aañkh se qur.āñ kahāñ rahā

samjhe haiñ ghar ḳhudā kā ye but-ḳhāna vo haram

phir ittifāq-e-kufr-o-musalmāñ kahāñ rahā

kāñToñ meñ phañs ke ho gayā sad-chāk shakl-e-gul

sālim bahār meñ mirā dāmāñ kahāñ rahā

sham-e-sahar kī tarah se be-nūr ho gayā

piirī meñ dāġh-e-ishq numāyāñ kahāñ rahā

ho nukta-sanjiyoñ se tirī shaad ai 'vafā'

aisā jahāñ meñ koī suḳhan-dāñ kahāñ rahā

piri mein dil shabab ka KHwahan kahan raha

iflas mein uruj ka arman kahan raha

sajda kiya buton ko to iman kahan raha

ai banda-e-KHuda tu musalman kahan raha

aamal-e-bad pe apne jo roya dam-e-fana

mera siyah nama-e-isyan kahan raha

mansur ne kaha jo anal-haq hua na zabt

sab raaz fash ho gaya pinhan kahan raha

rindon ko piTh pichhe bura kah raha hai tu

waiz mujhe bata tu musalman kahan raha

raftar-e-yar dekh ke nadim hua kahan

kabk-e-dari chaman mein KHiraman kahan raha

un se ziya-e-chehra-e-jaanan jo dekh le

tabinda charKH par mah-e-taban kahan raha

allah re zor-e-dast-e-junun ka bahaar mein

salim har ek tar-e-gareban kahan raha

fasl-e-bahaar mein tha ye mere junun ka zor

daman kahan raha hai gareban kahan raha

nikli jo ruh jism se begana ho gai

tha jo ki ittihad-e-tan-o-jaan kahan raha

sunte hi aib aur hunar us ka dekh le

aisi sifat ka koi suKHan-dan kahan raha

musa ko tur par jo tajalli nazar paDi

waraftagi mein hosh ka saman kahan raha

nazzara roz karta tha ru-e-nigar ka

poshida meri aankh se quran kahan raha

samjhe hain ghar KHuda ka ye but-KHana wo haram

phir ittifaq-e-kufr-o-musalman kahan raha

kanTon mein phans ke ho gaya sad-chaak shakl-e-gul

salim bahaar mein mera daman kahan raha

sham-e-sahar ki tarah se be-nur ho gaya

piri mein dagh-e-ishq numayan kahan raha

ho nukta-sanjiyon se teri shad ai 'wafa'

aisa jahan mein koi suKHan-dan kahan raha