piri mein jawani ke nishan DhunD raha hun

piirī meñ javānī ke nishāñ DhūñD rahā huuñ

khoyā hai kahāñ ḳhud ko kahāñ DhūñD rahā huuñ

kuchh maiñ ne ḳharīde haiñ rafīqoñ ke liye tiir

kis haath meñ ḳhālī hai kamāñ DhūñD rahā huuñ

duniyā meñ to rahne kā salīqa nahīñ aaya

aflāk pe rahne ko makāñ DhūñD rahā huuñ

ahvāl to sab apnā hī karnā hai mujhe arz

pairāya-e-lafz-e-digarāñ DhūñD rahā huuñ

ummīd mujhe hai dil-e-kāfir se vafā kī

but-ḳhāne meñ āvāz-e-azāñ DhūñD rahā huuñ

vo DhūñD rahe haiñ koī jaane kā bahāna

maiñ huuñ ki dil-e-soḳhta-jāñ DhūñD rahā huuñ

sach kahne pe āmāda hai vo aaj magar maiñ

is sach meñ hai kis kis kā ziyāñ DhūñD rahā huuñ

jiine kī tavānā.ī to baḳhshī hai ḳhudā ne

marne ke liye tāb-o-tavāñ DhūñD rahā huuñ

vo dil kahīñ murda mire pahlū meñ na nikle

maiñ jis ko karāñ-tā-ba-karāñ DhūñD rahā huuñ

ajdād ke tahzīb ke daftar ko jalā kar

maġhrib ke sahīfoñ meñ amaañ DhūñD rahā huuñ

uktā ke 'shahāb' ahl-e-samā.at ke karam se

haiñ yār-e-garāñ-gosh kahāñ DhūñD rahā huuñ

piri mein jawani ke nishan DhunD raha hun

khoya hai kahan KHud ko kahan DhunD raha hun

kuchh main ne KHaride hain rafiqon ke liye tir

kis hath mein KHali hai kaman DhunD raha hun

duniya mein to rahne ka saliqa nahin aaya

aflak pe rahne ko makan DhunD raha hun

ahwal to sab apna hi karna hai mujhe arz

pairaya-e-lafz-e-digaran DhunD raha hun

ummid mujhe hai dil-e-kafir se wafa ki

but-KHane mein aawaz-e-azan DhunD raha hun

wo DhunD rahe hain koi jaane ka bahana

main hun ki dil-e-soKHta-jaan DhunD raha hun

sach kahne pe aamada hai wo aaj magar main

is sach mein hai kis kis ka ziyan DhunD raha hun

jine ki tawanai to baKHshi hai KHuda ne

marne ke liye tab-o-tawan DhunD raha hun

wo dil kahin murda mere pahlu mein na nikle

main jis ko karan-ta-ba-karan DhunD raha hun

ajdad ke tahzib ke daftar ko jala kar

maghrib ke sahifon mein aman DhunD raha hun

ukta ke 'shahab' ahl-e-samaat ke karam se

hain yar-e-garan-gosh kahan DhunD raha hun