pite hi surKH aankhen hain mast-e-sharab ki

piite hī surḳh āñkheñ haiñ mast-e-sharāb kī

garmī to dekho Duube hue āftāb kī

ruḳh se judā jo hashr meñ tum ne naqāb kī

duniyā ye taab lā.egī do āftāb kī

saaqī ye raqm sach hai jo mujh par hisāb kī

botal pe haath rakh ke qasam khā sharāb kī

kyā kam thā husn-e-bāġh ki ai bāġhbān-e-husn

ik shāḳh tū ne aur lagā dī shabāb kī

vo to rahā kalīm ke isrār kā javāb

aur ye jo tū ne tuur kī miTTī ḳharāb kī

muusā ko us ne sar pe chaḌhāyā bhī thā bahut

jalve ne ḳhuub tuur kī miTTī ḳharāb kī

phero na āñkheñ tum mire ashkoñ ke josh par

tūfāñ meñ Dūbtī nahīñ kashtī habāb kī

allāh us kā kuchh bhī javānī pe haq nahīñ

barsoñ duā.eñ māñgī haiñ jis ne shabāb kī

rakhiye muaaf shaiḳh-jī masjid meñ hajv-e-mai

bāteñ ḳhudā ke ghar meñ na kiije sharāb kī

bāġh-e-jahāñ meñ aur bhī tum se to haiñ magar

har phuul meñ nahīñ hai nazākat gulāb kī

jab se ga.e haiñ dekh ke taare vo ai 'qamar'

sūrat badal ga.ī hai shab-e-māhtāb kī

pite hi surKH aankhen hain mast-e-sharab ki

garmi to dekho Dube hue aaftab ki

ruKH se juda jo hashr mein tum ne naqab ki

duniya ye tab laegi do aaftab ki

saqi ye raqm sach hai jo mujh par hisab ki

botal pe hath rakh ke qasam kha sharab ki

kya kam tha husn-e-bagh ki ai baghban-e-husn

ek shaKH tu ne aur laga di shabab ki

wo to raha kalim ke israr ka jawab

aur ye jo tu ne tur ki miTTi KHarab ki

musa ko us ne sar pe chaDhaya bhi tha bahut

jalwe ne KHub tur ki miTTi KHarab ki

phero na aankhen tum mere ashkon ke josh par

tufan mein Dubti nahin kashti habab ki

allah us ka kuchh bhi jawani pe haq nahin

barson duaen mangi hain jis ne shabab ki

rakhiye muaf shaiKH-ji masjid mein hajw-e-mai

baaten KHuda ke ghar mein na kije sharab ki

bagh-e-jahan mein aur bhi tum se to hain magar

har phul mein nahin hai nazakat gulab ki

jab se gae hain dekh ke tare wo ai 'qamar'

surat badal gai hai shab-e-mahtab ki