piroe ashkon ke ro-ro ke haar gori ne

piro.e ashkoñ ke ro-ro ke haar gorī ne

taḌap-taḌap ke guzārī bahār gorī ne

bujhā ke aas kī palkeñ kisī kī rāhoñ meñ

tamām 'umr kiyā intizār gorī ne

taras ga.e haiñ hañsī ke liye gulāb se hoñT

kiyā thā kaun ghaḌī jaane pyaar gorī ne

taras ga.ī hai hasīñ maañg motiyoñ ke liye

siñgār kar diyā kis par nisār gorī ne

hasīn phuul sā chehra hai khoyā khoyā huā

kahāñ luTā diyā dil kā qarār gorī ne

lagī kī aag meñ jal jal ke ruup raakh huā

zabāñ tak aane nahīñ dī pukār gorī ne

na āñsuoñ kī zabāñ se bhī dil kā bhed kahā

kiyā na aahoñ kā bhī e'tibār gorī ne

birah kī raat meñ phūTī na ek bhī to kiran

sajā.e palkoñ pe taare hazār gorī ne

gila kiyā na kisī se kaThor sājan kā

jahāñ ke tiir sahe be-shumār gorī ne

piroe ashkon ke ro-ro ke haar gori ne

taDap-taDap ke guzari bahaar gori ne

bujha ke aas ki palken kisi ki rahon mein

tamam 'umr kiya intizar gori ne

taras gae hain hansi ke liye gulab se honT

kiya tha kaun ghaDi jaane pyar gori ne

taras gai hai hasin mang motiyon ke liye

singar kar diya kis par nisar gori ne

hasin phul sa chehra hai khoya khoya hua

kahan luTa diya dil ka qarar gori ne

lagi ki aag mein jal jal ke rup rakh hua

zaban tak aane nahin di pukar gori ne

na aansuon ki zaban se bhi dil ka bhed kaha

kiya na aahon ka bhi e'tibar gori ne

birah ki raat mein phuTi na ek bhi to kiran

sajae palkon pe tare hazar gori ne

gila kiya na kisi se kaThor sajan ka

jahan ke tir sahe be-shumar gori ne