piya jo zahr-e-gham-e-zist angbin ki tarah

piyā jo zahr-e-ġham-e-zīst añgbīñ kī tarah

nikhar gayā huuñ kisī rū-e-āsmāñ kī tarah

mire vajūd ke sahrā-e-shab-zada pe ye kaun

kiran bikhertā rahtā hai mah-jabīñ kī tarah

maiñ apnī zaat meñ mahbūs ho ke baiTh rahā

bikhartā kaash tirī zulf-e-ambarīñ kī tarah

huī hai ḳhaak se merī numūd meñ bhī yahāñ

asīr-e-gardish-e-hālāt huuñ zamīñ kī tarah

maiñ apne zāhir-o-bātin meñ ek jaisā huuñ

farāḳh dil bhī hai merā mirī jabīñ kī tarah

maiñ ġham kī aag meñ ḳhāvar na jal ke raakh huā

vagarna maiñ bhī chamaktā kisī nagīñ kī tarah

piya jo zahr-e-gham-e-zist angbin ki tarah

nikhar gaya hun kisi ru-e-asman ki tarah

mere wajud ke sahra-e-shab-zada pe ye kaun

kiran bikherta rahta hai mah-jabin ki tarah

main apni zat mein mahbus ho ke baiTh raha

bikharta kash teri zulf-e-ambarin ki tarah

hui hai KHak se meri numud mein bhi yahan

asir-e-gardish-e-haalat hun zamin ki tarah

main apne zahir-o-baatin mein ek jaisa hun

faraKH dil bhi hai mera meri jabin ki tarah

main gham ki aag mein KHawar na jal ke rakh hua

wagarna main bhi chamakta kisi nagin ki tarah