piyenge aaj masjid hi sahi mai-KHana ho jae

piyeñge aaj masjid hī sahī mai-ḳhāna ho jaa.e

janāb-e-shaiḳh kā zarf-e-vazū paimāna ho jaa.e

zamāna bhuul jaa.e naam hī farhād-o-shīrīñ kā

hamāre dard kā qissa bhī ik afsāna ho jaa.e

ḳhudā ke vāste mahshar meñ be-parda na ho jaanā

tumhīñ par hūr-e-jannat kā kahīñ dhokā na ho jaa.e

sadāqat se kare insāñ jo niyyat jāñ-nisārī kī

yaqīnan dil meñ paidā himmat-e-mardāna ho jaa.e

mire ġham kī kahānī sun ke bole aur lutf aa.e

agar ek ek harf afsāne kā afsāna ho jaa.e

tumheñ hai jalva-e-rangīñ dikhāne se ġharaz sāhib

kisī ke hosh jaa.eñ yā koī dīvāna ho jaa.e

nikalne duuñ maiñ apne ghar se kyoñ un kī tamannā.eñ

nahīñ manzūr ye ābād ghar vīrāna ho jaa.e

kahāñ insān kī tāqat jo roke us ko dam-bhar meñ

kisī kī umr kā labrez jab paimāna ho jaa.e

tire mastoñ meñ gāḌhī chhan rahī hai mai-gusārī par

kahīñ aisā na ho un meñ sar-e-mai-ḳhāna ho jaa.e

agar vo mah-jamāl aa.e shab-e-tārīk ai 'sābir'

to zulmat duur ho raushan mirā kāshāna ho jaa.e

piyenge aaj masjid hi sahi mai-KHana ho jae

janab-e-shaiKH ka zarf-e-wazu paimana ho jae

zamana bhul jae nam hi farhad-o-shirin ka

hamare dard ka qissa bhi ek afsana ho jae

KHuda ke waste mahshar mein be-parda na ho jaana

tumhin par hur-e-jannat ka kahin dhoka na ho jae

sadaqat se kare insan jo niyyat jaan-nisari ki

yaqinan dil mein paida himmat-e-mardana ho jae

mere gham ki kahani sun ke bole aur lutf aae

agar ek ek harf afsane ka afsana ho jae

tumhein hai jalwa-e-rangin dikhane se gharaz sahib

kisi ke hosh jaen ya koi diwana ho jae

nikalne dun main apne ghar se kyon un ki tamannaen

nahin manzur ye aabaad ghar virana ho jae

kahan insan ki taqat jo roke us ko dam-bhar mein

kisi ki umr ka labrez jab paimana ho jae

tere maston mein gaDhi chhan rahi hai mai-gusari par

kahin aisa na ho un mein sar-e-mai-KHana ho jae

agar wo mah-jamal aae shab-e-tarik ai 'sabir'

to zulmat dur ho raushan mera kashana ho jae