khula hai jhuT ka bazar aao sach bolen

khulā hai jhuuT kā bāzār aao sach boleñ

na ho balā se ḳharīdār aao sach boleñ

sukūt chhāyā hai insāniyat kī qadroñ par

yahī hai mauqa-e-iz.hār aao sach boleñ

hameñ gavāh banāyā hai vaqt ne apnā

ba-nām-e-azmat-e-kirdār aao sach boleñ

sunā hai vaqt kā hākim baḌā hī munsif hai

pukār kar sar-e-darbār aao sach boleñ

tamām shahr meñ kyā ek bhī nahīñ mansūr

kaheñge kyā rasan-o-dār aao sach boleñ

bajā ki ḳhū-e-vafā ek bhī hasīñ meñ nahīñ

kahāñ ke ham bhī vafādār aao sach boleñ

jo vasf ham meñ nahīñ kyuuñ kareñ kisī meñ talāsh

agar zamīr hai bedār aao sach boleñ

chhupā.e se kahīñ chhupte haiñ daaġh chehre ke

nazar hai ā.ina-bardār aao sach boleñ

'qatīl' jin pe sadā pattharoñ ko pyaar aayā

kidhar ga.e vo gunahgār aao sach boleñ

khula hai jhuT ka bazar aao sach bolen

na ho bala se KHaridar aao sach bolen

sukut chhaya hai insaniyat ki qadron par

yahi hai mauqa-e-izhaar aao sach bolen

hamein gawah banaya hai waqt ne apna

ba-nam-e-azmat-e-kirdar aao sach bolen

suna hai waqt ka hakim baDa hi munsif hai

pukar kar sar-e-darbar aao sach bolen

tamam shahr mein kya ek bhi nahin mansur

kahenge kya rasan-o-dar aao sach bolen

baja ki KHu-e-wafa ek bhi hasin mein nahin

kahan ke hum bhi wafadar aao sach bolen

jo wasf hum mein nahin kyun karen kisi mein talash

agar zamir hai bedar aao sach bolen

chhupae se kahin chhupte hain dagh chehre ke

nazar hai aaina-bardar aao sach bolen

'qatil' jin pe sada pattharon ko pyar aaya

kidhar gae wo gunahgar aao sach bolen