poshak na tu pahniyo ai sarw-e-rawan surKH

poshāk na tū pahniyo ai sarv-e-ravāñ surḳh

ho jaa.e na partav se tire kaun-o-makāñ surḳh

yaañ bāda-e-ahmar ke chhalakte haiñ jo sāġhar

ai pīr-e-muġhāñ dekh ki hai saarī dukāñ surḳh

pī bāda-e-ahmar to ye kahne lagā gul-rū

maiñ surḳh huuñ tum surḳh zamīñ surḳh zamāñ surḳh

kyā paan kī surḳhī ne kiyā qatl kisī ko

shiddat se hai kyuuñ aaj tirī teġh-e-zabāñ surḳh

siine meñ dil-e-ġham-zada ḳhuuñ ho gayā shāyad

be-vaj.h bhī hote haiñ kahīñ ashk-e-ravāñ surḳh

kyā bhaḌke hai siine meñ mire ātish-e-furqat

jo aah ke ham-rāh nikaltā hai dhuāñ surḳh

ye qatl-e-ḳhizāñ par haiñ javānān-e-chaman shaad

har samt gul-o-lāla uḌāte haiñ nishāñ surḳh

gar merī shahādat kī bashārat nahīñ 'parvīñ'

phir kyuuñ hai ḳhat-e-shauq ke unvāñ ye nishāñ surḳh

poshak na tu pahniyo ai sarw-e-rawan surKH

ho jae na partaw se tere kaun-o-makan surKH

yan baada-e-ahmar ke chhalakte hain jo saghar

ai pir-e-mughan dekh ki hai sari dukan surKH

pi baada-e-ahmar to ye kahne laga gul-ru

main surKH hun tum surKH zamin surKH zaman surKH

kya pan ki surKHi ne kiya qatl kisi ko

shiddat se hai kyun aaj teri tegh-e-zaban surKH

sine mein dil-e-gham-zada KHun ho gaya shayad

be-wajh bhi hote hain kahin ashk-e-rawan surKH

kya bhaDke hai sine mein mere aatish-e-furqat

jo aah ke ham-rah nikalta hai dhuan surKH

ye qatl-e-KHizan par hain jawanan-e-chaman shad

har samt gul-o-lala uDate hain nishan surKH

gar meri shahadat ki bashaarat nahin 'parwin'

phir kyun hai KHat-e-shauq ke unwan ye nishan surKH