poshak teri ai gul-e-KHandan hai surKH sabz

poshāk terī ai gul-e-ḳhandāñ hai surḳh sabz

yā fasl-e-gul se rang-e-gulistāñ hai surḳh sabz

yā surḳh sabz rang hai fānūs-e-pairahan

jis meñ ye nūr-e-shama-e-farozāñ hai surḳh sabz

yā aaj phūlī hai inhīñ do rangoñ kī shafaq

jis meñ zuhūr-e-mahr-e-daraḳhshāñ hai surḳh sabz

aaya hai yā simaT ke ye qaus-e-quzah kā rang

jis meñ ye sho.ala barq kā tābāñ hai surḳh sabz

yā hai ye surḳh sabz libās-e-nasīm-e-sub.h

jis se tamām gulshan-e-daurāñ hai surḳh sabz

yā surḳh-o-sabz rang hai ā.īne kā ġhilāf

jis se nigāh-e-dīda-e-hairāñ hai surḳh sabz

yā surḳh-o-sabz rang kī ye dhuup chhāñv hai

is meñ ye jalva-e-mah-e-tābāñ hai surḳh sabz

rang-e-chaman se kyā ise tashbīh de 'vahīd'

us se tirā libās do-chandāñ hai surḳh sabz

poshak teri ai gul-e-KHandan hai surKH sabz

ya fasl-e-gul se rang-e-gulistan hai surKH sabz

ya surKH sabz rang hai fanus-e-pairahan

jis mein ye nur-e-shama-e-farozan hai surKH sabz

ya aaj phuli hai inhin do rangon ki shafaq

jis mein zuhur-e-mahr-e-daraKHshan hai surKH sabz

aaya hai ya simaT ke ye qaus-e-quzah ka rang

jis mein ye shoala barq ka taban hai surKH sabz

ya hai ye surKH sabz libas-e-nasim-e-subh

jis se tamam gulshan-e-dauran hai surKH sabz

ya surKH-o-sabz rang hai aaine ka ghilaf

jis se nigah-e-dida-e-hairan hai surKH sabz

ya surKH-o-sabz rang ki ye dhup chhanw hai

is mein ye jalwa-e-mah-e-taban hai surKH sabz

rang-e-chaman se kya ise tashbih de 'wahid'

us se tera libas do-chandan hai surKH sabz