poshida jab ho raaz ki munh mein zaban na ho

poshīda jab ho raaz ki muñh meñ zabāñ na ho

ham baat bhī kareñ to baġhair-az-fuġhāñ na ho

le jaa.eñ aah mujh ko mirī bad-gumāniyāñ

zālim vahāñ ki terā pata bhī jahāñ na ho

zāhid azāb-e-ishq-e-sanam lutf-e-haq samajh

ya.anī azaab ham ko yahāñ ho vahāñ na ho

nairangī-e-chaman jo mujhe yaad aa ga.ī

gul par huā gumān ki barg-e-ḳhizāñ na ho

tum ko maza na degī kabhī dāstān-e-ishq

jab tak hamāre muñh se ye qissa bayāñ na ho

naaqe ko qais kyā na lagā laa.e raah par

lailā kā rāzdār agar sārbāñ na ho

tohmat kisī ko zulm kī ai 'dāġh' kyoñ lagā.eñ

shikva butoñ se kyā jo ḳhudā mehrbāñ na ho

poshida jab ho raaz ki munh mein zaban na ho

hum baat bhi karen to baghair-az-fughan na ho

le jaen aah mujh ko meri bad-gumaniyan

zalim wahan ki tera pata bhi jahan na ho

zahid azab-e-ishq-e-sanam lutf-e-haq samajh

yani azab hum ko yahan ho wahan na ho

nairangi-e-chaman jo mujhe yaad aa gai

gul par hua guman ki barg-e-KHizan na ho

tum ko maza na degi kabhi dastan-e-ishq

jab tak hamare munh se ye qissa bayan na ho

naqe ko qais kya na laga lae rah par

laila ka raazdar agar sarban na ho

tohmat kisi ko zulm ki ai 'dagh' kyon lagaen

shikwa buton se kya jo KHuda mehrban na ho