pukar use ki ab is KHamushi ka hal nikle

pukār use ki ab is ḳhāmushī kā hal nikle

javāb aa.e to mumkin hai baat chal nikle

zamāna aag thā aur ishq lau-lagī rassī

hazār jal ke bhī kab is balā ke bal nikle

maiñ apnī ḳhaak pe ik umr tak barastā rahā

thamā to dekhā ki kīchaḌ meñ kuchh kamal nikle

maiñ jis meñ ḳhush bhī thā zinda bhī thā tumhārā bhī thā

ka.ī zamāne nichoḌūñ to ek pal nikle

kuchh ek ḳhvāb vahāñ bo rahūñgā sochā hai

vo nain agar mire nainoñ se bhī sajal nikle

maiñ apne hāthoñ ko rotā thā har duā ke baa'd

ḳhudā ke haath to mujh se ziyāda shal nikle

dayār-e-ishq meñ sab kā guzar nahīñ mumkin

ka.ī jo pairoñ pe aa.e the sar ke bal nikle

bahār jazb hai jis meñ use banāte hue

tamām rang mire canvas pe dull nikle

jamī huī thī mirī aañkh ik alaav ke gird

kuchh ek ḳhvāb to yūñhī pighal pighal nikle

badal ke rakh hī diyā mujh ko umr bhar ke liye

tirī hī tarah tire ġham bhī be-badal nikle

jo dil meñ aa.e the aahaT utaar kar apnī

vo dil se nikle to phir kitnā pur-ḳhalal nikle

pukar use ki ab is KHamushi ka hal nikle

jawab aae to mumkin hai baat chal nikle

zamana aag tha aur ishq lau-lagi rassi

hazar jal ke bhi kab is bala ke bal nikle

main apni KHak pe ek umr tak barasta raha

thama to dekha ki kichaD mein kuchh kamal nikle

main jis mein KHush bhi tha zinda bhi tha tumhaara bhi tha

kai zamane nichoDun to ek pal nikle

kuchh ek KHwab wahan bo rahunga socha hai

wo nain agar mere nainon se bhi sajal nikle

main apne hathon ko rota tha har dua ke ba'd

KHuda ke hath to mujh se ziyaada shal nikle

dayar-e-ishq mein sab ka guzar nahin mumkin

kai jo pairon pe aae the sar ke bal nikle

bahaar jazb hai jis mein use banate hue

tamam rang mere canwas pe dull nikle

jami hui thi meri aankh ek alaw ke gird

kuchh ek KHwab to yunhi pighal pighal nikle

badal ke rakh hi diya mujh ko umr bhar ke liye

teri hi tarah tere gham bhi be-badal nikle

jo dil mein aae the aahaT utar kar apni

wo dil se nikle to phir kitna pur-KHalal nikle