pukarti hai KHamoshi meri fughan ki tarah

pukārtī hai ḳhamoshī mirī fuġhāñ kī tarah

nigāheñ kahtī haiñ sab rāz-e-dil zabāñ kī tarah

bigaḌ ga.ī hai yahāñ be-tarah jahāñ kī tarah

kahāñ kī vaz.a kahāñ kī adā kahāñ kī tarah

chhuḌā de qaid se ai barq ham asīroñ ko

lagā de aag qafas ko bhī āshiyāñ kī tarah

kabhī to sulh bhī ho jaa.e zohd o mastī meñ

ilāhī shaiḳh bhī mai-ḳhvār ho muġhāñ kī tarah

jalā ke dāġh-e-mohabbat ne dil ko ḳhaak kiyā

bahār aa.ī mire baaġh meñ ḳhizāñ kī tarah

hayā ne rok liyā jazb-e-dil ne khīñch liyā

chale vo tiir kī sūrat khiñchī kamāñ kī tarah

talāsh-e-yār meñ chhoḌī na sarzamīñ koī

hamāre paañv meñ chakkar hai āsmāñ kī tarah

jo samjhe ḳhizr to qaul-e-shahīd-e-ulfat ko

girah meñ bāñdh rakkhe umr-e-jāvedāñ kī tarah

sune jo hazrat-e-zāhid se vasf jannat ke

to saaf phir ga.ī āñkhoñ meñ us makāñ kī tarah

jhukī hī jaatī hai kuchh ḳhud-ba-ḳhud hayā se vo aañkh

girī hī paḌtī hai bīmār-e-nā-tavāñ kī tarah

ye sadd-e-rāh huā kis kā pās-e-rusvā.ī

ruke hue haiñ mire ashk kārvāñ kī tarah

adā-e-matlab-e-dil ham se siikh jaa.e koī

unheñ sunā hī diyā haal dāstāñ kī tarah

maze haiñ us dahan-e-zaḳhm ke liye kyā kyā

jo chūse tiir ke paikān ko zabāñ kī tarah

samajh ke kījiye barbād merā musht-e-ġhubār

ye le na aa.e koī chakkar āsmāñ kī tarah

ye dil hai aap kā ghar rahiye shauq se lekin

shakeb-o-rāhat-o-sabr-o-qarār-e-jāñ kī tarah

qayāmat aa.ī shab-e-vasl mere ghar ke paas

raqīb ne use āvāz dī azaañ kī tarah

shab us kī bazm meñ thā sham.a par bhī rashk hameñ

ki muñh meñ shole ko gul-gīr le zabāñ kī tarah

mujhe ye hukm hai zinhār tum na karnā ishq

nasīhateñ bhī vo karte haiñ imtihāñ kī tarah

ham apne zo.af ke sadqe biThā diyā aisā

hile na dar se tire sañg-e-āstāñ kī tarah

kuchh un se kahne ko baiThe the ham ki ḳhalvat meñ

raqīb aa hī gayā marg-e-nā-gahāñ kī tarah

shikasta baal huuñ vo murġh-e-nātavāñ-o-za.īf

ki maiñ to maiñ na uḌe mere āshiyāñ kī tarah

na hoñge soz-e-mohabbat ke dil-jale ThanDe

bharī hai ātish-e-ġham maġhz-e-ustuḳhvāñ kī tarah

na chhoḌ said-e-mohabbat ko ḳhaak par sayyād

use bhī Daal le tū dosh par kamāñ kī tarah

zabān-e-ḳhār huī tar hamārī vahshat se

ki chhāle phūTe bhī chashm-e-ḳhūñ-fishāñ kī tarah

ḳhudā qubūl kare 'dāġh' tum jo sū-e-adam

chale ho ishq-e-butāñ le ke armuġhāñ kī tarah

pukarti hai KHamoshi meri fughan ki tarah

nigahen kahti hain sab raaz-e-dil zaban ki tarah

bigaD gai hai yahan be-tarah jahan ki tarah

kahan ki waza kahan ki ada kahan ki tarah

chhuDa de qaid se ai barq hum asiron ko

laga de aag qafas ko bhi aashiyan ki tarah

kabhi to sulh bhi ho jae zohd o masti mein

ilahi shaiKH bhi mai-KHwar ho mughan ki tarah

jala ke dagh-e-mohabbat ne dil ko KHak kiya

bahaar aai mere bagh mein KHizan ki tarah

haya ne rok liya jazb-e-dil ne khinch liya

chale wo tir ki surat khinchi kaman ki tarah

talash-e-yar mein chhoDi na sarzamin koi

hamare panw mein chakkar hai aasman ki tarah

jo samjhe KHizr to qaul-e-shahid-e-ulfat ko

girah mein bandh rakkhe umr-e-jawedan ki tarah

sune jo hazrat-e-zahid se wasf jannat ke

to saf phir gai aankhon mein us makan ki tarah

jhuki hi jati hai kuchh KHud-ba-KHud haya se wo aankh

giri hi paDti hai bimar-e-na-tawan ki tarah

ye sadd-e-rah hua kis ka pas-e-ruswai

ruke hue hain mere ashk karwan ki tarah

ada-e-matlab-e-dil hum se sikh jae koi

unhen suna hi diya haal dastan ki tarah

maze hain us dahan-e-zaKHm ke liye kya kya

jo chuse tir ke paikan ko zaban ki tarah

samajh ke kijiye barbaad mera musht-e-ghubar

ye le na aae koi chakkar aasman ki tarah

ye dil hai aap ka ghar rahiye shauq se lekin

shakeb-o-rahat-o-sabr-o-qarar-e-jaan ki tarah

qayamat aai shab-e-wasl mere ghar ke pas

raqib ne use aawaz di azan ki tarah

shab us ki bazm mein tha shama par bhi rashk hamein

ki munh mein shole ko gul-gir le zaban ki tarah

mujhe ye hukm hai zinhaar tum na karna ishq

nasihaten bhi wo karte hain imtihan ki tarah

hum apne zoaf ke sadqe biTha diya aisa

hile na dar se tere sang-e-astan ki tarah

kuchh un se kahne ko baiThe the hum ki KHalwat mein

raqib aa hi gaya marg-e-na-gahan ki tarah

shikasta baal hun wo murgh-e-natawan-o-zaif

ki main to main na uDe mere aashiyan ki tarah

na honge soz-e-mohabbat ke dil-jale ThanDe

bhari hai aatish-e-gham maghz-e-ustuKHwan ki tarah

na chhoD said-e-mohabbat ko KHak par sayyaad

use bhi Dal le tu dosh par kaman ki tarah

zaban-e-KHar hui tar hamari wahshat se

ki chhaale phuTe bhi chashm-e-KHun-fishan ki tarah

KHuda qubul kare 'dagh' tum jo su-e-adam

chale ho ishq-e-butan le ke armughan ki tarah