puKHta hone na diya KHam bhi rahne na diya

puḳhta hone na diyā ḳhaam bhī rahne na diyā

ishq ne ḳhaas to kyā aam bhī rahne na diyā

hā.e-re gardish-e-ayyām ki ab ke tū ne

shikva-e-gardish-e-ayyām bhī rahne na diyā

āḳhir-kār pukārā use zālim kah kar

dard ne dost kā ikrām bhī rahne na diyā

koī kyuuñ aa.egā dobāra tirī jannat meñ

daana bhī chhīn liyā daam bhī rahne na diyā

aish meñ pahle kahāñ apnī basar hotī thī

yaad ne do ghaḌī ārām bhī rahne na diyā

dil ko āvārgiyāñ duur bahut chhoḌ aa.iiñ

zikr-e-ḳhair ek taraf naam bhī rahne na diyā

vahī zanjīr hai tere bhī gale meñ 'rāhīl'

jis ne sūraj ko lab-e-bām bhī rahne na diyā

puKHta hone na diya KHam bhi rahne na diya

ishq ne KHas to kya aam bhi rahne na diya

hae-re gardish-e-ayyam ki ab ke tu ne

shikwa-e-gardish-e-ayyam bhi rahne na diya

aaKHir-kar pukara use zalim kah kar

dard ne dost ka ikram bhi rahne na diya

koi kyun aaega dobara teri jannat mein

dana bhi chhin liya dam bhi rahne na diya

aish mein pahle kahan apni basar hoti thi

yaad ne do ghaDi aaram bhi rahne na diya

dil ko aawargiyan dur bahut chhoD aain

zikr-e-KHair ek taraf nam bhi rahne na diya

wahi zanjir hai tere bhi gale mein 'rahil'

jis ne suraj ko lab-e-baam bhi rahne na diya