پر ہے دامن چمن کا خاروں سے

پر ہے دامن چمن کا خاروں سے

دم الجھتا ہے ان بہاروں سے

کیا شکایت فریب کھانے کی

سابقہ ہے فریب کاروں سے

یاس کو ہم نے دور ہی رکھا

کام جب تک چلا سہاروں سے

بیچ دریا میں ڈوبنے والے

کیا تعلق ہمیں کناروں سے

اے شب غم یہ دیکھتا کیا ہوں

روشنی چھن گئی ستاروں سے

سیر نظارگی نہیں ہوتی

کوئی کہہ دے ترے نظاروں سے

لوگ سن سن کے مسکراتے ہیں

وقت کی مدح بے قراروں سے

بس اسی ایک سے ہے کام ارمؔ

کون الجھا کرے ہزاروں سے