پر کیف انجمن ہے مری انجمن ابھی

پر کیف انجمن ہے مری انجمن ابھی

ہے ساز دل پہ یاد تری نغمہ زن ابھی

آماج گاہ فتنہ و شر ہے وطن ابھی

رہبر کے بھیس میں ہیں یہاں راہزن ابھی

کرنے ہیں زندگی میں مجھے غم کے تجربے

اترے نہ دل سے نشۂ رنج و محن ابھی

اے رند ترک مے پہ نہ کر ناز اس قدر

اٹھی نہیں گھٹا کوئی توبہ شکن ابھی

رکتا ہے ہاتھ دامن ہستی پہ بار بار

شاید خرد کی حد میں ہے دیوانہ پن ابھی

رونے دو حسرتوں کو ذرا اور اے خلشؔ

للہ نعش دل پہ نہ ڈالو کفن ابھی