pur-nur jis ke husn se madfan tha kaun tha

pur-nūr jis ke husn se madfan thā kaun thā

chehra ye kis shahīd kā raushan thā kaun thā

Thahrā gayā hai lā ke jo manzil meñ ishq kī

kyā jaane rahnumā thā ki rahzan thā kaun thā

toḌā thā kis ke dil ko khilaune kī tarah se

āshiq tumhārā jab ki laḌakpan thā kaun thā

kis dil se hai ḳhudā.ī meñ ījād dard-e-ishq

roz-e-azal jo mūjid-e-shevan thā kaun thā

hū kā maqām thā mujhe rotī thī be-kasī

koī na thā jahāñ mirā madfan thā kaun thā

jhuk jhuk ke dekhtā thā vo kis kī jigar kā ghaav

tar jis ke ḳhuuñ meñ yaar kā dāman thā kaun thā

ham muskurāte the vo dikhātā thā sair-e-bāġh

dam kis pe shefta dam-e-murdan thā kaun thā

insān thā ki koī parī-zād thā 'sharaf'

dil merā jis ke nuur se raushan thā kaun thā

pur-nur jis ke husn se madfan tha kaun tha

chehra ye kis shahid ka raushan tha kaun tha

Thahra gaya hai la ke jo manzil mein ishq ki

kya jaane rahnuma tha ki rahzan tha kaun tha

toDa tha kis ke dil ko khilaune ki tarah se

aashiq tumhaara jab ki laDakpan tha kaun tha

kis dil se hai KHudai mein ijad dard-e-ishq

roz-e-azal jo mujid-e-shewan tha kaun tha

hu ka maqam tha mujhe roti thi be-kasi

koi na tha jahan mera madfan tha kaun tha

jhuk jhuk ke dekhta tha wo kis ki jigar ka ghaw

tar jis ke KHun mein yar ka daman tha kaun tha

hum muskuraate the wo dikhata tha sair-e-bagh

dam kis pe shefta dam-e-murdan tha kaun tha

insan tha ki koi pari-zad tha 'sharaf'

dil mera jis ke nur se raushan tha kaun tha