pur-nur KHayalon ki barsat teri baaten

pur-nūr ḳhayāloñ kī barsāt tirī bāteñ

har shaḳhs ye kahtā hai naġhmāt tirī bāteñ

ruḳhsār hasīñ darpan āñkhoñ meñ hayā raushan

kirdār tirā sandal jazbāt tirī bāteñ

simTe to dil-e-āshiq phaile to jahāñ kam hai

sadiyoñ ko banā degī lamhāt tirī bāteñ

ab ḳhud se bhī milne kī fursat hī kahāñ ham ko

har shaam tirī mahfil har raat tirī bāteñ

nazreñ jo uThā do tum taare bhī chamak jaa.eñ

aur chāñd ko de jaa.e sauġhāt tirī bāteñ

aa jaatī hai milne ko har raat hameñ 'zākir'

phūloñ kī ridā oḌhe bārāt tirī bāteñ

pur-nur KHayalon ki barsat teri baaten

har shaKHs ye kahta hai naghmat teri baaten

ruKHsar hasin darpan aankhon mein haya raushan

kirdar tera sandal jazbaat teri baaten

simTe to dil-e-ashiq phaile to jahan kam hai

sadiyon ko bana degi lamhat teri baaten

ab KHud se bhi milne ki fursat hi kahan hum ko

har sham teri mahfil har raat teri baaten

nazren jo uTha do tum tare bhi chamak jaen

aur chand ko de jae saughat teri baaten

aa jati hai milne ko har raat hamein 'zakir'

phulon ki rida oDhe baraat teri baaten