pur-nur zindagi ki sahar kho rahe hain log

pur-nūr zindagī kī sahar kho rahe haiñ log

sūraj chaḌhā huā hai magar so rahe haiñ log

kaise khileñge phuul mohabbat ke shahr meñ

kāñTe jab apnī raah meñ ḳhud bo rahe haiñ log

chehre fasurda-hāl haiñ āñkheñ bujhī bujhī

azm-o-amal se duur ye kyā ho rahe haiñ log

mumkin nahīñ hayāt kī manzil nasīb ho

rāh-e-farār DhūñD ke jab so rahe haiñ log

har dam urūs-e-vaqt kī barham-mizājiyāñ

ik taaza inqalāb ko phir ro rahe haiñ log

rāhat kā zikr chhoḌiye kaise mile qarār

har lamha ġham ke bojh ko jab Dho rahe haiñ log

kuchh un ke iḳhtiyār-e-mohabbat pe sochiye

hañste hue jo dāġh-e-jigar dho rahe haiñ log

hālāt sāzgār hoñ hargiz nahīñ ye ġham

kahne ko hañs rahe haiñ magar ro rahe haiñ log

ta.amīr-e-zindagī se gurezāñ hai zindagī

'nayyar' nashāt-e-kaif meñ gum ho rahe haiñ log

pur-nur zindagi ki sahar kho rahe hain log

suraj chaDha hua hai magar so rahe hain log

kaise khilenge phul mohabbat ke shahr mein

kanTe jab apni rah mein KHud bo rahe hain log

chehre fasurda-haal hain aankhen bujhi bujhi

azm-o-amal se dur ye kya ho rahe hain log

mumkin nahin hayat ki manzil nasib ho

rah-e-farar DhunD ke jab so rahe hain log

har dam urus-e-waqt ki barham-mizajiyan

ek taza inqalab ko phir ro rahe hain log

rahat ka zikr chhoDiye kaise mile qarar

har lamha gham ke bojh ko jab Dho rahe hain log

kuchh un ke iKHtiyar-e-mohabbat pe sochiye

hanste hue jo dagh-e-jigar dho rahe hain log

haalat sazgar hon hargiz nahin ye gham

kahne ko hans rahe hain magar ro rahe hain log

tamir-e-zindagi se gurezan hai zindagi

'nayyar' nashat-e-kaif mein gum ho rahe hain log