pur-shor talatum ka mudawa koi aahaT

pur-shor talātum kā mudāvā koī aahaT

sañgīn fazā meñ thī dilāsā koī aahaT

be-dard havāoñ ne hirāsāñ to kiyā thā

thī saath magar un ke shanāsā koī aahaT

jab kaalī ghaTā qahr kā sāmān banī thī

de kar ga.ī bijlī kā ujālā koī aahaT

goshe meñ tasavvur jahāñ bīmār paḌā thā

kartī thī mohabbat se ishāra koī aahaT

ḳhāmosh ḳhayāloñ ke qafas meñ tū paḌā rah

jāgegī nahīñ dar pe dobāra koī aahaT

sailāb ke narġhe meñ ghirī jab se tamannā

ik sapnā dikhātī hai suhānā koī aahaT

kartī hai kabhī ġhaiz kī bāñhoñ ko pakaḌ kar

bechain samundar meñ tamāshā koī aahaT

ik yaad kā āñchal jo uḌā tez havā meñ

dene lagī hamdard bulāvā koī aahaT

rahmat bharī āñkhoñ se zarā dekhnā 'ja.afar'

tūfān meñ DhūñDe hai sahārā koī aahaT

pur-shor talatum ka mudawa koi aahaT

sangin faza mein thi dilasa koi aahaT

be-dard hawaon ne hirasan to kiya tha

thi sath magar un ke shanasa koi aahaT

jab kali ghaTa qahr ka saman bani thi

de kar gai bijli ka ujala koi aahaT

goshe mein tasawwur jahan bimar paDa tha

karti thi mohabbat se ishaara koi aahaT

KHamosh KHayalon ke qafas mein tu paDa rah

jagegi nahin dar pe dobara koi aahaT

sailab ke narghe mein ghiri jab se tamanna

ek sapna dikhati hai suhana koi aahaT

karti hai kabhi ghaiz ki banhon ko pakaD kar

bechain samundar mein tamasha koi aahaT

ek yaad ka aanchal jo uDa tez hawa mein

dene lagi hamdard bulawa koi aahaT

rahmat bhari aankhon se zara dekhna 'jafar'

tufan mein DhunDe hai sahaara koi aahaT