پر سوز ترنم میں کیا شمع غزل خواں ہے

پر سوز ترنم میں کیا شمع غزل خواں ہے

لو جھومتی جاتی ہے پروانہ بھی رقصاں ہے

دیرینہ خرابوں پر تعمیر گلستاں ہے

با وصف ہجوم گل رنگینیٔ ویراں ہے

شعلہ ہو کہ خوشبو ہو تاثیر میں یکساں ہے

ہر شمع مہکتی ہے ہر پھول فروزاں ہے

دل کے کسی جذبے کو کیا نام ابھی سے دوں

جو ان کی نگاہوں سے ٹکرائے وہ ارماں ہے

آسودہ زمانے کی بے راہروی توبہ

وہ مشق ستم جب تک جاری رہے احساں ہے

یاد آتی ہے راہوں میں شادابیٔ نخلستاں

پھر پائے برہنہ ہے پر خار بیاباں ہے

خاموشی کے عالم میں دل ڈوبتا جاتا ہے

ٹھہری ہوئی موجوں کے دامن میں بھی طوفاں ہے

اے بزم سخن تیرا ایسے میں خدا حافظ

پلکیں وہ جھکی سی ہیں مانیؔ بھی غزل خواں ہے