purana zaKHm jise tajraba ziyaada hai

purānā zaḳhm jise tajraba ziyāda hai

ziyāda dikhtā nahīñ sochtā ziyāda hai

zarā ziyāda mohabbat bhī chāhiye ham ko

hamārā dil bhī to TuuTā huā ziyāda hai

tirā visāl zarūrat hai jism-o-jāñ kī to ho

tirā ḳhayāl mire kaam kā ziyāda hai

jo masjidoñ kī taraf is qadar bulāte haiñ

to kyā ye hai ki kahīñ kuchh ḳhudā ziyāda hai

maiñ baar baar jo us kī talab meñ jaatā huuñ

ḳhayāl-e-ḳhām meñ shāyad mazā ziyāda hai

amīr-e-shahr se ab kaun bāz-purs kare

ki us ke paas bahut sī qabā ziyāda hai

ye aa.ina mirā ā.īna-e-mohabbat hai

par us meñ aks kisī aur kā ziyāda hai

badan ke baaġh meñ sab raunaqeñ haiñ dil ke qarīb

isī navāh meñ bād-e-sabā ziyāda hai

hujūm-e-shiddat-e-'ehsās' baaḌh par hai aaj

karam bhī aaj ġhazal kā zarā ziyāda hai

purana zaKHm jise tajraba ziyaada hai

ziyaada dikhta nahin sochta ziyaada hai

zara ziyaada mohabbat bhi chahiye hum ko

hamara dil bhi to TuTa hua ziyaada hai

tera visal zarurat hai jism-o-jaan ki to ho

tera KHayal mere kaam ka ziyaada hai

jo masjidon ki taraf is qadar bulate hain

to kya ye hai ki kahin kuchh KHuda ziyaada hai

main bar bar jo us ki talab mein jata hun

KHayal-e-KHam mein shayad maza ziyaada hai

amir-e-shahr se ab kaun baz-purs kare

ki us ke pas bahut si qaba ziyaada hai

ye aaina mera aaina-e-mohabbat hai

par us mein aks kisi aur ka ziyaada hai

badan ke bagh mein sab raunaqen hain dil ke qarib

isi nawah mein baad-e-saba ziyaada hai

hujum-e-shiddat-e-'ehsas' baDh par hai aaj

karam bhi aaj ghazal ka zara ziyaada hai