purane ghaw nae dukh bhulane baiThe hain

purāne ghaav na.e dukh bhulāne baiThe haiñ

dukāneñ lutf-o-karam kī sajāne baiThe haiñ

hamīñ ko vo bhī samajhte haiñ behis-o-bekār

ki apnī prem kathā.eñ sunāne baiThe haiñ

hujūm-e-nauha-garāñ meñ huuñ mutma.in jaise

ye log merā hī mātam manāne baiThe haiñ

tumhāre baad jachā hī nahīñ koī ham ko

ye phūl-jism hameñ kyoñ lubhāne baiThe haiñ

ye jaan kar hī to maiñ ḳhud ko dafn kar aaya

vo merī gor pe aañsū bahāne baiThe haiñ

vo shaḳhs jis ne kiyā un ko har jagah rusvā

usī kī piiTh vo ab thapthapāne baiThe haiñ

mirā surāġh kahīñ bhī na un ko mil paayā

ab apne aap ko chūnā lagāne baiThe haiñ

maiñ fasl-e-gul se bhī fasl-e-ḳhizāñ se bhī huuñ ḳhush

mirā yaqīn vo kyoñ Dagmagāne baiThe haiñ

karam hameñ to rafīqoñ ne Das liyā 'īraj'

sitam ki kaaTe ko marham lagāne baiThe haiñ

purane ghaw nae dukh bhulane baiThe hain

dukanen lutf-o-karam ki sajaane baiThe hain

hamin ko wo bhi samajhte hain behis-o-bekar

ki apni prem kathaen sunane baiThe hain

hujum-e-nauha-garan mein hun mutmain jaise

ye log mera hi matam manane baiThe hain

tumhaare baad jacha hi nahin koi hum ko

ye phul-jism hamein kyon lubhane baiThe hain

ye jaan kar hi to main KHud ko dafn kar aaya

wo meri gor pe aansu bahane baiThe hain

wo shaKHs jis ne kiya un ko har jagah ruswa

usi ki piTh wo ab thapthapane baiThe hain

mera suragh kahin bhi na un ko mil paya

ab apne aap ko chuna lagane baiThe hain

main fasl-e-gul se bhi fasl-e-KHizan se bhi hun KHush

mera yaqin wo kyon Dagmagane baiThe hain

karam hamein to rafiqon ne Das liya 'iraj'

sitam ki kaTe ko marham lagane baiThe hain