purane ghar se nikal kar nae makan ki samt

purāne ghar se nikal kar na.e makān kī samt

bahut se log ga.e ik 'ajab jahān kī samt

pukārtā hai jo sadiyoñ se ham ko ai yaaro

chalo chale chaleñ us TuuTe sā.ebān kī samt

jo ek 'umr se rahtā thā barf-zāroñ meñ

chalā hai kis liye jaltī huī chaTān kī samt

milā thā raah meñ baiThā jo ek din ham ko

sunā hai jā chukā vo shaḳhs āsmān kī samt

mirā jahāz jo pahuñchegā us jazīre meñ

na koī ġhaur se dekhegā bādbān kī samt

kabhī jo sochā hai haq baat kah duuñ ai 'as.ad'

baḌhī haiñ qaiñchiyāñ kitnī mirī zabān kī samt

purane ghar se nikal kar nae makan ki samt

bahut se log gae ek 'ajab jahan ki samt

pukarta hai jo sadiyon se hum ko ai yaro

chalo chale chalen us TuTe saeban ki samt

jo ek 'umr se rahta tha barf-zaron mein

chala hai kis liye jalti hui chaTan ki samt

mila tha rah mein baiTha jo ek din hum ko

suna hai ja chuka wo shaKHs aasman ki samt

mera jahaz jo pahunchega us jazire mein

na koi ghaur se dekhega baadban ki samt

kabhi jo socha hai haq baat kah dun ai 'asad'

baDhi hain qainchiyan kitni meri zaban ki samt