purkhon se jo mili hai wo daulat bhi le na jae

purkhoñ se jo milī hai vo daulat bhī le na jaa.e

zālim havā-e-shahr hai izzat bhī le na jaa.e

vahshat to sañg-o-ḳhisht kī tartīb le ga.ī

ab fikr ye hai dasht kī vus.at bhī le na jaa.e

pīchhe paḌā hai sab ke jo parchhā.iyoñ kā paap

ham se adāvatoñ kī vo aadat bhī le na jaa.e

āñgan ujaḌ gayā hai to ġham is kā tā-ba-kai

mohtāt rah ki ab ke vo ye chhat bhī le na jaa.e

barbādiyāñ sameTne kā us ko shauq hai

lekin vo un ke naam pe barkat bhī le na jaa.e

aadil hai us ke adl par ham ko yaqīn hai

lekin vo zulm sahne kī himmat bhī le na jaa.e

un sohbatoñ kā zikr to zikr-e-fuzūl hai

Dar hai ki lutf-e-shukr-o-shikāyat bhī le na jaa.e

ḳhud se bhī baḌh ke us pe bharosa na kījiye

vo aa.ina hai dekhiye sūrat bhī le na jaa.e

purkhon se jo mili hai wo daulat bhi le na jae

zalim hawa-e-shahr hai izzat bhi le na jae

wahshat to sang-o-KHisht ki tartib le gai

ab fikr ye hai dasht ki wusat bhi le na jae

pichhe paDa hai sab ke jo parchhaiyon ka pap

hum se adawaton ki wo aadat bhi le na jae

aangan ujaD gaya hai to gham is ka ta-ba-kai

mohtat rah ki ab ke wo ye chhat bhi le na jae

barbaadiyan sameTne ka us ko shauq hai

lekin wo un ke nam pe barkat bhi le na jae

aadil hai us ke adl par hum ko yaqin hai

lekin wo zulm sahne ki himmat bhi le na jae

un sohbaton ka zikr to zikr-e-fuzul hai

Dar hai ki lutf-e-shukr-o-shikayat bhi le na jae

KHud se bhi baDh ke us pe bharosa na kijiye

wo aaina hai dekhiye surat bhi le na jae