پرسش اے چشم غم گسار نہ کر

پرسش اے چشم غم گسار نہ کر

دل کو رہ رہ کے اشک بار نہ کر

آبلہ پائی ہے حیات مری

میری راہوں سے دور خار نہ کر

یہ خدا پر بھی حرف رکھتے ہیں

نکتہ چینوں سے دل فگار نہ کر

دم رخصت بہت رلائے گی

زندگی سے تو اتنا پیار نہ کر

اے صبا کھل اٹھیں گے زخم دل

ہم سے تو ذکر نو بہار نہ کر

میں بھی تیرا خدا نہیں تو بھی

روش کفر اختیار نہ کر

اپنی خود کردگی دکھانے کو

حادثوں پر ہی انحصار نہ کر

دامن گل رخاں میں پھول بھی ہیں

سنگ ہی کا تو انتظار نہ کر

بار احساں سے مر نہ جاؤں کہیں

ہر نفس لطف بے شمار نہ کر

تو جسے دیکھ کر تڑپ اٹھے

وہ ستم اے ستم شعار نہ کر

تو نہ گن پائے گا انہیں تا عمر

رازؔ کے زخم دل شمار نہ کر