pursish ai chashm-e-gham-gusar na kar

pursish ai chashm-e-ġham-gusār na kar

dil ko rah-rah ke ashk-bār na kar

ābla-pā.ī hai hayāt mirī

merī rāhoñ se duur ḳhaar na kar

ye ḳhudā par bhī harf rakhte haiñ

nukta-chīnoñ se dil-figār na kar

dam-e-ruḳhsat bahut rulā.egī

zindagī se tū itnā pyaar na kar

ai sabā khil uTheñge zaḳhm-e-dil

ham se tū zikr-e-nau-bahār na kar

maiñ bhī terā ḳhudā nahīñ tū bhī

ravish-e-kufr iḳhtiyār na kar

apnī ḳhud-kardagī dikhāne ko

hādsoñ par hī inhisār na kar

dāman-e-gul-ruḳhāñ meñ phuul bhī haiñ

sang hī kā tū intizār na kar

bār-e-ehsāñ se mar na jā.ūñ kahīñ

har-nafas lutf-e-be-shumār na kar

tū jise dekh kar taḌap uTThe

vo sitam ai sitam-shi.ār na kar

tū na gin pā.egā inheñ tā-umr

'rāz' ke zaḳhm-e-dil shumār na kar

pursish ai chashm-e-gham-gusar na kar

dil ko rah-rah ke ashk-bar na kar

aabla-pai hai hayat meri

meri rahon se dur KHar na kar

ye KHuda par bhi harf rakhte hain

nukta-chinon se dil-figar na kar

dam-e-ruKHsat bahut rulaegi

zindagi se tu itna pyar na kar

ai saba khil uThenge zaKHm-e-dil

hum se tu zikr-e-nau-bahaar na kar

main bhi tera KHuda nahin tu bhi

rawish-e-kufr iKHtiyar na kar

apni KHud-kardagi dikhane ko

hadson par hi inhisar na kar

daman-e-gul-ruKHan mein phul bhi hain

sang hi ka tu intizar na kar

bar-e-ehsan se mar na jaun kahin

har-nafas lutf-e-be-shumar na kar

tu jise dekh kar taDap uTThe

wo sitam ai sitam-shiar na kar

tu na gin paega inhen ta-umr

'raaz' ke zaKHm-e-dil shumar na kar