pursish hai chashm-e-ashk-e-fasha par na aae harf

pursish hai chashm-e-ashk-e-fashā. par na aa.e harf

Dūbeñ bhī ham to sail-e-ravāñ par na aa.e harf

donoñ hī apnī apnī jagah lā-javāb haiñ

apne yaqīñ pe un ke gumāñ par na aa.e harf

ai rashk itnā vahm-o-gumāñ bhī bajā nahīñ

ehsās-e-qurbat-e-rag-e-jāñ par na aa.e harf

dil nā-murād sho.ala-e-āriz se jal gayā

Darte the ham ki soz-e-nihāñ par na aa.e harf

hushiyār bazm-e-ġhair meñ naam un kā aa na jaa.e

ai naġhma-sañj josh-e-bayāñ par na aa.e harf

tīr-e-nigāh dil meñ tarāzū huā to ho

ab tere abruoñ kī kamāñ par na aa.e harf

ham un ke rū-ba-rū rahe is maslahat se chup

mahfil meñ apne ijz-e-bayāñ par na aa.e harf

uḌ jaa.e teġh se to rahe sarfarāz sar

kaT jaa.e baat par to zabāñ par na aa.e harf

is kashmakash meñ terī galī se pare rahe

aa.e kahāñ pe harf kahāñ par na aa.e harf

'tarzī' tavāf-e-ḳhāna-e-ḳhālī se ḳhush nahīñ

bas jaao tum to dil ke makāñ par na aa.e harf

pursish hai chashm-e-ashk-e-fasha par na aae harf

Duben bhi hum to sail-e-rawan par na aae harf

donon hi apni apni jagah la-jawab hain

apne yaqin pe un ke guman par na aae harf

ai rashk itna wahm-o-guman bhi baja nahin

ehsas-e-qurbat-e-rag-e-jaan par na aae harf

dil na-murad shoala-e-ariz se jal gaya

Darte the hum ki soz-e-nihan par na aae harf

hushiyar bazm-e-ghair mein nam un ka aa na jae

ai naghma-sanj josh-e-bayan par na aae harf

tir-e-nigah dil mein taraazu hua to ho

ab tere abruon ki kaman par na aae harf

hum un ke ru-ba-ru rahe is maslahat se chup

mahfil mein apne ijz-e-bayan par na aae harf

uD jae tegh se to rahe sarfaraaz sar

kaT jae baat par to zaban par na aae harf

is kashmakash mein teri gali se pare rahe

aae kahan pe harf kahan par na aae harf

'tarzi' tawaf-e-KHana-e-KHali se KHush nahin

bas jao tum to dil ke makan par na aae harf