pursish jo hogi tujhse jallad kya karega

pursish jo hogī tujh se jallād kyā karegā

le ḳhuun maiñ ne baḳhshā tū yaad kyā karegā

huuñ daam meñ pur-afshāñ aur sādgī se hairāñ

kyuuñ tez kī haiñ chhuriyāñ sayyād kyā karegā

zālim ye soch kar ab detā hai bosa-e-lab

jab hoñT sī diye phir fariyād kyā karegā

zanjīr tār-e-dāmāñ hai tauq ik garebāñ

zor-e-junūñ na kam ho haddād kyā karegā

ham Duub kar mareñge hasrat rahegī tujh ko

jab ḳhaak hī na hogī barbād kyā karegā

yāqūb qat' kar deñ ummīd-e-vasl dil se

yūsuf sā banda koī āzād kyā karegā

dil le ke pūchhtā hai tū kis kā shefta hai

bhūlā abhī se zālim phir yaad kyā karegā

ai ḳhatt-e-bayāz aariz darkār hai jo tujh ko

tahrīr husn kī kuchh rūdād kyā karegā

kunj-e-qafas se ik din hogī rihā.ī apnī

mar jā.eñge to āḳhir sayyād kyā karegā

misl-e-sipand dil hai betāb soz-e-ġham meñ

rah jā.egā taḌap kar fariyād kyā karegā

ai shaiḳh bhar gayā hai kyuuñ va.az kī havā meñ

rīsh-e-safed apnī barbād kyā karegā

zulm-o-sitam se bhī ab zālim ne haath khīñchā

is se sitam vo baḌh kar ījād kyā karegā

az-bas-ki be-hunar huuñ maiñ nañg-e-mo'tariz huuñ

mazmūñ pe mere koī īrād kyā karegā

ai 'nazm' jis ko chāhe vo de bahisht dozaḳh

namrūd kyā karegā shaddād kyā karegā

pursish jo hogi tujh se jallad kya karega

le KHun main ne baKHsha tu yaad kya karega

hun dam mein pur-afshan aur sadgi se hairan

kyun tez ki hain chhuriyan sayyaad kya karega

zalim ye soch kar ab deta hai bosa-e-lab

jab honT si diye phir fariyaad kya karega

zanjir tar-e-daman hai tauq ek gareban

zor-e-junun na kam ho haddad kya karega

hum Dub kar marenge hasrat rahegi tujh ko

jab KHak hi na hogi barbaad kya karega

yaqub qat' kar den ummid-e-wasl dil se

yusuf sa banda koi aazad kya karega

dil le ke puchhta hai tu kis ka shefta hai

bhula abhi se zalim phir yaad kya karega

ai KHatt-e-bayaz aariz darkar hai jo tujh ko

tahrir husn ki kuchh rudad kya karega

kunj-e-qafas se ek din hogi rihai apni

mar jaenge to aaKHir sayyaad kya karega

misl-e-sipand dil hai betab soz-e-gham mein

rah jaega taDap kar fariyaad kya karega

ai shaiKH bhar gaya hai kyun waz ki hawa mein

rish-e-safed apni barbaad kya karega

zulm-o-sitam se bhi ab zalim ne hath khincha

is se sitam wo baDh kar ijad kya karega

az-bas-ki be-hunar hun main nang-e-mo'tariz hun

mazmun pe mere koi irad kya karega

ai 'nazm' jis ko chahe wo de bahisht dozaKH

namrud kya karega shaddad kya karega