puchh mat kal aaine mein kya hua

pūchh mat kal aa.ine meñ kyā huā

apne zinda hone kā dhoka huā

roz sūraj Dūbtā ugtā huā

vaqt kī ik kiil par laTkā huā

aa gayā le kar udhārī raushnī

chāñd ne sūraj ko hai pahnā huā

tishnagī apnī bujhā.eñ kaise ham

jo samundar thā vo ab sahrā huā

shahr se jab bhī ye dil uktā gayā

dasht kī jānib mirā jaanā huā

ḳhūbiyāñ merī koī gintā nahīñ

ik zarā sī bhuul kā charchā huā

aa ga.ī huuñ duur chalte chalte maiñ

āsmāñ par hai vahīñ Thahrā huā

yaad us kī dil se kyuuñ jaatī nahīñ

vo to 'sīmā' kal thā ik guzrā huā

puchh mat kal aaine mein kya hua

apne zinda hone ka dhoka hua

roz suraj Dubta ugta hua

waqt ki ek kil par laTka hua

aa gaya le kar udhaari raushni

chand ne suraj ko hai pahna hua

tishnagi apni bujhaen kaise hum

jo samundar tha wo ab sahra hua

shahr se jab bhi ye dil ukta gaya

dasht ki jaanib mera jaana hua

KHubiyan meri koi ginta nahin

ek zara si bhul ka charcha hua

aa gai hun dur chalte chalte main

aasman par hai wahin Thahra hua

yaad us ki dil se kyun jati nahin

wo to 'sima' kal tha ek guzra hua