puchh mat mera lahu sarf-e-sinan kitna hua

pūchh mat merā lahū sarf-e-sināñ kitnā huā

dekh ye aa kar ki zālim kā ziyāñ kitnā huā

ḳhauf-e-jāñ thī us kī teġh-e-chashm kī tezī magar

khā liyā jab zaḳhm to ārām-e-jāñ kitnā huā

ho rahī haiñ āsmāñ meñ in kī parvāzeñ bahut

in parindoñ se magar tai āsmāñ kitnā huā

har taraf gahrī siyāhī hai muhīt-e-'ishq meñ

ek sham'-e-dil ke bujhne se dhuāñ kitnā huā

vo jo majlis thī alam-pāroñ ke paḌhne kī vahāñ

kuchh batā mujh ko mirā qissa bayāñ kitnā huā

kar diyā mere liye farsh-e-badan ārāsta

raat hote hī vo mujh par mehrbāñ kitnā huā

maiñ ne to us ke liye āñkheñ bichā.ī thiiñ magar

pur-tapākī se vo merī bad-gumāñ kitnā huā

yaad karne kī hameñ mohlat mile to ham batā.eñ

zulm terī mamlikat meñ kab kahāñ kitnā huā

puchh mat mera lahu sarf-e-sinan kitna hua

dekh ye aa kar ki zalim ka ziyan kitna hua

KHauf-e-jaan thi us ki tegh-e-chashm ki tezi magar

kha liya jab zaKHm to aaram-e-jaan kitna hua

ho rahi hain aasman mein in ki parwazen bahut

in parindon se magar tai aasman kitna hua

har taraf gahri siyahi hai muhit-e-'ishq mein

ek sham'-e-dil ke bujhne se dhuan kitna hua

wo jo majlis thi alam-paron ke paDhne ki wahan

kuchh bata mujh ko mera qissa bayan kitna hua

kar diya mere liye farsh-e-badan aarasta

raat hote hi wo mujh par mehrban kitna hua

main ne to us ke liye aankhen bichai thin magar

pur-tapaki se wo meri bad-guman kitna hua

yaad karne ki hamein mohlat mile to hum bataen

zulm teri mamlikat mein kab kahan kitna hua