puchhen wo kash haal dil-e-be-qarar ka

pūchheñ vo kaash haal dil-e-be-qarār kā

ham bhī kaheñ ki shukr hai parvardigār kā

lāzim agar hai shukr hī parvardigār kā

phir kyā ilaaj gardish-e-lail-o-nahār kā

sayyād bhī pahuñch gayā gul-chī bhī baaġh meñ

ai ham-safīr aa gayā mausam bahār kā

tadbīr kyā ho sabr-o-shakeb-o-qarār kī

vo tund-ḳhū hai bas kā na dil iḳhtiyār kā

kyūñ-kar miTe nadāmat-e-iz.hār-e-ārzū

aalam nazar meñ hai nigah-e-sharmsār kā

qānūn kis ne badlā hai qudrat kā shaiḳh-jī

daarū hai ab bhī mai hī ġham-e-rozgār kā

un nāmiyoñ ke hashr se ibrat-pazīr ho

baaqī nahīñ nishān bhī jin ke ġhubār kā

rakkhegā be-qarār tumheñ bhī tamām umr

marnā taḌap taḌap ke kisī be-qarār kā

be-laus ho havas se agar ishq ai 'vafā'

hai zikr-e-yār meñ bhī maza vasl-e-yār kā

puchhen wo kash haal dil-e-be-qarar ka

hum bhi kahen ki shukr hai parwardigar ka

lazim agar hai shukr hi parwardigar ka

phir kya ilaj gardish-e-lail-o-nahaar ka

sayyaad bhi pahunch gaya gul-chi bhi bagh mein

ai ham-safir aa gaya mausam bahaar ka

tadbir kya ho sabr-o-shakeb-o-qarar ki

wo tund-KHu hai bas ka na dil iKHtiyar ka

kyun-kar miTe nadamat-e-izhaar-e-arzu

aalam nazar mein hai nigah-e-sharmsar ka

qanun kis ne badla hai qudrat ka shaiKH-ji

daru hai ab bhi mai hi gham-e-rozgar ka

un namiyon ke hashr se ibrat-pazir ho

baqi nahin nishan bhi jin ke ghubar ka

rakkhega be-qarar tumhein bhi tamam umr

marna taDap taDap ke kisi be-qarar ka

be-laus ho hawas se agar ishq ai 'wafa'

hai zikr-e-yar mein bhi maza wasl-e-yar ka