puchhi na chashm-e-tar ki na aah-e-rasa ki baat

pūchhī na chashm-e-tar kī na āh-e-rasā kī baat

karte rahe vo mujh se bas āb-o-havā kī baat

kyā baat maiñ se baat nikaltī chalī ga.ī

thā mudda'ā yahī ki na ho mudda'ā kī baat

rasm-o-rah-e-jahāñ kī sifārish rahī magar

phir bhī to aane paa.ī na ahl-e-vafā kī baat

kyā rasm-e-iltifāt zamāne se uTh ga.ī

sab kī zabāñ pe hai sitam-e-nā-ravā kī baat

tūfāñ kā ḳhatra sun ke na kar ḳhauf is qadar

āḳhir ḳhudā kī baat nahīñ nāḳhudā kī baat

goyā 'asad' hai dil kī zabāñ dil kā aa.ina

kis darja saaf hotī hai ahl-e-safā kī baat

puchhi na chashm-e-tar ki na aah-e-rasa ki baat

karte rahe wo mujh se bas aab-o-hawa ki baat

kya baat main se baat nikalti chali gai

tha mudda'a yahi ki na ho mudda'a ki baat

rasm-o-rah-e-jahan ki sifarish rahi magar

phir bhi to aane pai na ahl-e-wafa ki baat

kya rasm-e-iltifat zamane se uTh gai

sab ki zaban pe hai sitam-e-na-rawa ki baat

tufan ka KHatra sun ke na kar KHauf is qadar

aaKHir KHuda ki baat nahin naKHuda ki baat

goya 'asad' hai dil ki zaban dil ka aaina

kis darja saf hoti hai ahl-e-safa ki baat