puchhi na KHabar kabhi hamari

pūchhī na ḳhabar kabhī hamārī

lī ḳhuub ḳhabar ajī hamārī

ham lā.eq-e-bandagī nahīñ to

bas ḳhair hai bandagī hamārī

ai dīda-e-nam na tham tū hargiz

hai is meñ hī behtarī hamārī

yaañ terī kamar hī jab na dekheñ

phir hech hai zindagī hamārī

ham jaan chuke ki jaan ke saath

jāvegī ye jāñkanī hamārī

chalne kā liyā jo naam tū ne

bas jaan abhī chalī hamārī

bigḌe ho bhale bhī baat kahte

qismat hī burī banī hamārī

us zulf ke silsile meñ haiñ ham

hai umr bahut baḌī hamārī

kyūñkar na kaTī zabāñ tumhārī

haañ aur karo badī hamārī

kahte haiñ palaT gayā vo rah se

taqdīr ulaT ga.ī hamārī

ab hañste haiñ ham pe log varna

mash.hūr thī yaañ hañsī hamārī

ham haTte haiñ mulk-e-ishq se kab

heTī kisī ne kahī hamārī

kyā kaam kisī se ham ko 'ehsān'

ham aur ye be-kasī hamārī

puchhi na KHabar kabhi hamari

li KHub KHabar aji hamari

hum laeq-e-bandagi nahin to

bas KHair hai bandagi hamari

ai dida-e-nam na tham tu hargiz

hai is mein hi behtari hamari

yan teri kamar hi jab na dekhen

phir hech hai zindagi hamari

hum jaan chuke ki jaan ke sath

jawegi ye jaankani hamari

chalne ka liya jo nam tu ne

bas jaan abhi chali hamari

bigDe ho bhale bhi baat kahte

qismat hi buri bani hamari

us zulf ke silsile mein hain hum

hai umr bahut baDi hamari

kyunkar na kaTi zaban tumhaari

han aur karo badi hamari

kahte hain palaT gaya wo rah se

taqdir ulaT gai hamari

ab hanste hain hum pe log warna

mashhur thi yan hansi hamari

hum haTte hain mulk-e-ishq se kab

heTi kisi ne kahi hamari

kya kaam kisi se hum ko 'ehsan'

hum aur ye be-kasi hamari