puchho agar to karte hain inkar sab ke sab

pūchho agar to karte haiñ inkār sab ke sab

sach ye ki haiñ hayāt se bezār sab ke sab

apnī ḳhabar kisī ko nahīñ phir bhī jaane kyuuñ

paḌhte haiñ roz shahr meñ aḳhbār sab ke sab

thā ek maiñ jo shart-e-vafā toḌtā rahā

hālāñki bā-vafā the mire yaar sab ke sab

socho to nafratoñ kā zaḳhīra hai ek dil

karte haiñ yuuñ to pyaar kā iz.hār sab ke sab

zindāñ koī qarīb nahīñ aur na raqs-gāh

sunte haiñ ik ajiib sī jhankār sab ke sab

maidān-e-jañg aane se pahle palaT ga.e

nikle the le ke haath meñ talvār sab ke sab

zehnoñ meñ khaultā thā jo laavā vo jam gayā

maflūj ho ke rah ga.e fankār sab ke sab

puchho agar to karte hain inkar sab ke sab

sach ye ki hain hayat se bezar sab ke sab

apni KHabar kisi ko nahin phir bhi jaane kyun

paDhte hain roz shahr mein aKHbar sab ke sab

tha ek main jo shart-e-wafa toDta raha

haalanki ba-wafa the mere yar sab ke sab

socho to nafraton ka zaKHira hai ek dil

karte hain yun to pyar ka izhaar sab ke sab

zindan koi qarib nahin aur na raqs-gah

sunte hain ek ajib si jhankar sab ke sab

maidan-e-jang aane se pahle palaT gae

nikle the le ke hath mein talwar sab ke sab

zehnon mein khaulta tha jo lawa wo jam gaya

mafluj ho ke rah gae fankar sab ke sab