puchhte hain wo hamein kya chahiye

pūchhte haiñ vo hameñ kyā chāhiye

sādgī to un kī dekhā chāhiye

ḳhālī haath un kī galī meñ jaa.eñ kyā

choT khāne ko kaleja chāhiye

māne-e-taslīm agar pindār hai

but ye ka.aba se nikālā chāhiye

va.ada-e-taqrīb-e-fardā marhabā

kuchh to jiine kā bahānā chāhiye

buḳhl se yaañ chāhiye ḳhauf-e-ḳhudā

kam hai us kāfir ko jitnā chāhiye

dil meñ hai shauq-e-mudārāt-e-junūñ

āgahī mahv-e-tamāshā chāhiye

shādmānī kī tamanna kyā kareñ

ġham bhī kab itnā hai jitnā chāhiye

puchhte hain wo hamein kya chahiye

sadgi to un ki dekha chahiye

KHali hath un ki gali mein jaen kya

choT khane ko kaleja chahiye

mane-e-taslim agar pindar hai

but ye kaba se nikala chahiye

wada-e-taqrib-e-farda marhaba

kuchh to jine ka bahana chahiye

buKHl se yan chahiye KHauf-e-KHuda

kam hai us kafir ko jitna chahiye

dil mein hai shauq-e-mudaraat-e-junun

aagahi mahw-e-tamasha chahiye

shadmani ki tamanna kya karen

gham bhi kab itna hai jitna chahiye