puchhte kya ho tera ye haal kaisa ho gaya

pūchhte kyā ho tirā ye haal kaisā ho gayā

tum na jaano to ḳhudā jaane mujhe kyā ho gayā

āshiqī meñ vahm baḌhte baḌhte saudā ho gayā

qatra qatra jam.a hote hote dariyā ho gayā

vo sarāpā naaz hai mujh se burā to kyā karūñ

chaar ne achchhā kahā jis ko vo achchhā ho gayā

āshiqī meñ naam agar darkār hai bad-nām ho

dekh sab kuchh ho gayā jab qais rusvā ho gayā

kuchh ho lekin ab mirā dil tum se phir saktā nahīñ

ye to jis kā ho gayā kam-baḳht us kā ho gayā

apne pahlū meñ biThāyā aap ne aġhyār ko

dekhiye baiThe biThā.e kā ye jhagḌā ho gayā

le liyā yād-e-mizha ne mujh ko sail-e-ashk se

Dūbne vaale ko tinke kā sahārā ho gayā

dāġh-hā-e-hijr meñ bhī dil meñ haiñ ḳhār-e-shauq bhī

baaġh kā baaġh aur ye sahrā kā sahrā ho gayā

le ke dil ilzām dete ho ġhanīmat hai yahī

maal kā muul aa gayā adle kā badlā ho gayā

dil kī ghabrāhaT nasīm-e-sub.h-dam se kam huī

vo na aa.e ġhaib se sāmān paidā ho gayā

kyā yahī hai sharm tere bhole-pan ke maiñ nisār

muñh pe donoñ haath rakh lene se pardā ho gayā

merī har ik baat qānūn-e-mohabbat hai magar

ai safī' maiñ shā.irī karne se jhūTā ho gayā

puchhte kya ho tera ye haal kaisa ho gaya

tum na jaano to KHuda jaane mujhe kya ho gaya

aashiqi mein wahm baDhte baDhte sauda ho gaya

qatra qatra jama hote hote dariya ho gaya

wo sarapa naz hai mujh se bura to kya karun

chaar ne achchha kaha jis ko wo achchha ho gaya

aashiqi mein nam agar darkar hai bad-nam ho

dekh sab kuchh ho gaya jab qais ruswa ho gaya

kuchh ho lekin ab mera dil tum se phir sakta nahin

ye to jis ka ho gaya kam-baKHt us ka ho gaya

apne pahlu mein biThaya aap ne aghyar ko

dekhiye baiThe biThae ka ye jhagDa ho gaya

le liya yaad-e-mizha ne mujh ko sail-e-ashk se

Dubne wale ko tinke ka sahaara ho gaya

dagh-ha-e-hijr mein bhi dil mein hain KHar-e-shauq bhi

bagh ka bagh aur ye sahra ka sahra ho gaya

le ke dil ilzam dete ho ghanimat hai yahi

mal ka mul aa gaya adle ka badla ho gaya

dil ki ghabrahaT nasim-e-subh-dam se kam hui

wo na aae ghaib se saman paida ho gaya

kya yahi hai sharm tere bhole-pan ke main nisar

munh pe donon hath rakh lene se parda ho gaya

meri har ek baat qanun-e-mohabbat hai magar

ai safi' main shairi karne se jhuTa ho gaya