puchhte phirte hain ghar wale ye ghar kis ka hai

pūchhte phirte haiñ ghar vaale ye ghar kis kā hai

kaunsī bastī hai yaaro ye nagar kis kā hai

ghar ke āñgan meñ khilī dhuup ko bhī chhū na sakeñ

kaash samjhā.e koī mujh ko ye Dar kis kā hai

kashtiyāñ Daal ke tum chāhe tasallī kar lo

varna ye baat musallam hai bhañvar kis kā hai

muntazir jis ke haiñ har haath meñ tīkhe patthar

gar nahīñ merā to batlāo vo sar kis kā hai

marhala pahle to is vaqt kā ham tai kar leñ

baa'd meñ socheñge aage kā safar kis kā hai

mujh se kyā merā patā pūchh rahe ho yaaro

vo makāñ jis meñ hai dīvār na dar kis kā hai

aaj ke daur meñ 'ābid' ke alāva koī

vaqt kī raah meñ aḌ jaa.e jigar kis kā hai

puchhte phirte hain ghar wale ye ghar kis ka hai

kaunsi basti hai yaro ye nagar kis ka hai

ghar ke aangan mein khili dhup ko bhi chhu na saken

kash samjhae koi mujh ko ye Dar kis ka hai

kashtiyan Dal ke tum chahe tasalli kar lo

warna ye baat musallam hai bhanwar kis ka hai

muntazir jis ke hain har hath mein tikhe patthar

gar nahin mera to batlao wo sar kis ka hai

marhala pahle to is waqt ka hum tai kar len

ba'd mein sochenge aage ka safar kis ka hai

mujh se kya mera pata puchh rahe ho yaro

wo makan jis mein hai diwar na dar kis ka hai

aaj ke daur mein 'abid' ke alawa koi

waqt ki rah mein aD jae jigar kis ka hai