pujne wale sabhi log hain farzane ko

pūjne vaale sabhī log haiñ farzāne ko

pūchhtā kaun hai is shahr meñ dīvāne ko

guftugū kūcha-o-bāzār kī le aate haiñ

jaane kyā log samajhte haiñ ḳhudā-ḳhāne ko

maiñ banāyā gayā īsār-o-vafā kī ḳhātir

terī taḳhlīq huī zulm-o-sitam Dhāne ko

ham se zī-fahm un āñkhoñ kī piyā karte haiñ

nā-samajh log chale jaate haiñ maiḳhāne ko

tum se bigḌī huī taqdīr hamārī na banī

ham to gulzār banā dete haiñ vīrāne ko

apnī ḳhātir koī sauġhāt na māñgī us ne

ḳhat meñ likkhā hai mujhe lauT ke aa jaane ko

us ne 'anjum' lab-o-ruḳhsār kī ra.anā.ī se

de diyā rang-e-haqīqat mire afsāne ko

pujne wale sabhi log hain farzane ko

puchhta kaun hai is shahr mein diwane ko

guftugu kucha-o-bazar ki le aate hain

jaane kya log samajhte hain KHuda-KHane ko

main banaya gaya isar-o-wafa ki KHatir

teri taKHliq hui zulm-o-sitam Dhane ko

hum se zi-fahm un aankhon ki piya karte hain

na-samajh log chale jate hain maiKHane ko

tum se bigDi hui taqdir hamari na bani

hum to gulzar bana dete hain virane ko

apni KHatir koi saughat na mangi us ne

KHat mein likkha hai mujhe lauT ke aa jaane ko

us ne 'anjum' lab-o-ruKHsar ki ranai se

de diya rang-e-haqiqat mere afsane ko