purab des ki yaaden laya phir mausam ka tikha-pan

pūrab des kī yādeñ laayā phir mausam kā tīkhā-pan

mujh se pahroñ uns kare hai tanhā.ī kā sūnā-pan

dil ke rang-mahal meñ jaise barsoñ koī na jhāñkā ho

tasvīroñ kī be-nūr āñkheñ shīsha shīsha dhuñdlā-pan

kitnī baar lahū royā hai kitnī baar jale haiñ charāġh

kitne ġhamoñ kī aañch meñ nikhrā dard kā mīThā mīThā-pan

ham Thahre darvesh janam se pyaar kiyā to aa baiThe

ham se kyā ye tīkhī nazreñ ham se kyā begāna-pan

anjāne logoñ tak pahuñchā zikr tumhārī chāhat kā

galī galī mash.hūr huā hai 'māhir' kā dīvāna-pan

purab des ki yaaden laya phir mausam ka tikha-pan

mujh se pahron uns kare hai tanhai ka suna-pan

dil ke rang-mahal mein jaise barson koi na jhanka ho

taswiron ki be-nur aankhen shisha shisha dhundla-pan

kitni bar lahu roya hai kitni bar jale hain charagh

kitne ghamon ki aanch mein nikhra dard ka miTha miTha-pan

hum Thahre darwesh janam se pyar kiya to aa baiThe

hum se kya ye tikhi nazren hum se kya begana-pan

anjaane logon tak pahuncha zikr tumhaari chahat ka

gali gali mashhur hua hai 'mahir' ka diwana-pan