پورے ہر شخص کے ارمان نہیں ہوتے ہیں

پورے ہر شخص کے ارمان نہیں ہوتے ہیں

اتنا مایوس مری جان نہیں ہوتے ہیں

تو پریشاں ہے تو خوابوں میں بسا لے مجھ کو

اشک آنکھوں کے نگہبان نہیں ہوتے ہیں

بات مندر کی ہو مسجد کی ہو گردوارے کی

لوگ اب صاحب ایمان نہیں ہوتے ہیں

تیری قربت تری دوری تری یادوں کی قسم

ہم کبھی بے سر و سامان نہیں ہوتے ہیں

گھر میں زندہ ہی جلا دیتے ہیں انسانوں کو

احمدآباد میں شمشان نہیں ہوتے ہیں

آپ سے ملنے کی ہر لمحہ تمنا ہے مگر

آپ سے ملنے کے امکان نہیں ہوتے ہیں

جب بھی گھبراؤ کسی غم سے بلا لینا ہمیں

اپنے ہیں اپنوں کے احسان نہیں ہوتے ہیں

بھول بھی جاؤ وہ غالبؔ کا زمانہ یارو

زود کیا لوگ پشیمان نہیں ہوتے ہیں

ہر قدم سوچ سمجھ کر ہی بڑھانا آذرؔ

مرحلے زیست کے آسان نہیں ہوتے ہیں