pure har shaKHs ke arman nahin hote hain

puure har shaḳhs ke armān nahīñ hote haiñ

itnā māyūs mirī jaan nahīñ hote haiñ

tū pareshāñ hai to ḳhvāboñ meñ basā le mujh ko

ashk āñkhoñ ke nigahbān nahīñ hote haiñ

baat mandir kī ho masjid kī ho gurudvāre kī

log ab sāhib-e-īmān nahīñ hote haiñ

terī qurbat tirī duurī tirī yādoñ kī qasam

ham kabhī be-sar-o-sāmān nahīñ hote haiñ

ghar meñ zinda hī jalā dete haiñ insānoñ ko

ahmadābād meñ shamshān nahīñ hote haiñ

aap se milne kī har lamha tamanna hai magar

aap se milne ke imkān nahīñ hote haiñ

jab bhī ghabrāo kisī ġham se bulā lenā hameñ

apne haiñ apnoñ ke ehsān nahīñ hote haiñ

bhuul bhī jaao vo 'ġhālib' kā zamāna yaaro

zuud kyā log pashemān nahīñ hote haiñ

har qadam soch samajh kar hī baḌhānā 'āzar'

marhale ziist ke āsān nahīñ hote haiñ

pure har shaKHs ke arman nahin hote hain

itna mayus meri jaan nahin hote hain

tu pareshan hai to KHwabon mein basa le mujh ko

ashk aankhon ke nigahban nahin hote hain

baat mandir ki ho masjid ki ho gurudware ki

log ab sahib-e-iman nahin hote hain

teri qurbat teri duri teri yaadon ki qasam

hum kabhi be-sar-o-saman nahin hote hain

ghar mein zinda hi jala dete hain insanon ko

ahmadabaad mein shamshan nahin hote hain

aap se milne ki har lamha tamanna hai magar

aap se milne ke imkan nahin hote hain

jab bhi ghabrao kisi gham se bula lena hamein

apne hain apnon ke ehsan nahin hote hain

bhul bhi jao wo 'ghaalib' ka zamana yaro

zud kya log pasheman nahin hote hain

har qadam soch samajh kar hi baDhana 'azar'

marhale zist ke aasan nahin hote hain