پوری لگن امنگ سے میں نے نہیں کیا

پوری لگن امنگ سے میں نے نہیں کیا

کوئی بھی کام ڈھنگ سے میں نے نہیں کیا

اجڑا پھر ایک شوخ وہابن کے عشق میں

جب مشورہ ملنگ سے میں نے نہیں کیا

اپنے ہر ایک عشق میں صادق رہوں گا میں

آغاز یوںہی جھنگ سے میں نے نہیں کیا

اپنی خوشی سے آئے ہیں بیعت کے واسطے

قائل کسی کو جنگ سے میں نے نہیں کیا

مہر و وفا سے سر کیا ہر ایک معرکہ

تیغ و سپر تفنگ سے میں نے نہیں کیا

شکوہ کیا بھی تو کیا پیروں کے داغ سے

ان بیڑیوں کے زنگ سے میں نے نہیں کیا