pyar har kisi ka jo aadmi kama paya

pyaar har kisī kā jo aadmī kamā paayā

lutf jiine kā aslī vo hī bas uThā paayā

yuuñ to sab banā lekin bas isī kā ronā hai

aadmī nahīñ ḳhud ko aadmī banā paayā

ġham mujhe diyā aisā zindagī ne tohfe meñ

qalb kī tijorī meñ jo nahīñ samā paayā

uljhe uljhe rahte haiñ sab inhīñ savāloñ meñ

zindagī meñ kyā khoyā zindagī meñ kyā paayā

hai na.ī umangoñ se bhar gayā merā dāman

pyaar kā tire jab se dil ne aasrā paayā

toḌne kī koshish meñ rāt-din rahā lekin

hausla kabhī 'hīrā' ġham nahīñ Digā paayā

pyar har kisi ka jo aadmi kama paya

lutf jine ka asli wo hi bas uTha paya

yun to sab bana lekin bas isi ka rona hai

aadmi nahin KHud ko aadmi bana paya

gham mujhe diya aisa zindagi ne tohfe mein

qalb ki tijori mein jo nahin sama paya

uljhe uljhe rahte hain sab inhin sawalon mein

zindagi mein kya khoya zindagi mein kya paya

hai nai umangon se bhar gaya mera daman

pyar ka tere jab se dil ne aasra paya

toDne ki koshish mein raat-din raha lekin

hausla kabhi 'hira' gham nahin Diga paya