pyar ka aaj chalan dosto dushwar hai kyon

pyaar kā aaj chalan dosto dushvār hai kyoñ

aaj insān ḳhud insān se bezār hai kyoñ

aaj ke daur ne ye kaun sī karvaT lī hai

aaj ke daur meñ ma.asūm gunahgār hai kyoñ

be-gunāhoñ kā lahū shahr meñ arzāñ hī sahī

āsmāñ par bhī vahī rang numūdār hai kyoñ

maiñ to mar jaane ko tayyār huuñ dushman ke liye

merā dushman bhī magar marne ko tayyār hai kyoñ

kyā tire kūche hī kī den tarahdārī hai

tere kūche se jo guzrā vo tarah-dār hai kyoñ

pahle barsoñ meñ bhī sunñe ko na miltā thā ye naam

aaj hoñToñ pe har ik ke rasan-o-dār hai kyoñ

kyā ham is daur ko shub.hāt kā ik daur kaheñ

shak meñ Duubā huā har shaḳhs kā kirdār hai kyoñ

kyoñ ḳhulūs aur sadāqat se nahīñ kuchh hāsil

makr hī makr zamāne ko sazā-vār hai kyoñ

tere maiḳhāne ke faizān-o-karam sab taslīm

tere maiḳhāne kā har jaam nigūñ-sār hai kyoñ

kal tak us shoḳh kī yādoñ pe thā jiine kā madār

aaj us shoḳh kī har yaad girāñ-bār hai kyoñ

gosha-e-dil meñ bhī but-ḳhāne huā karte haiñ

'qādir' is baat se ab aap ko inkār hai kyoñ

pyar ka aaj chalan dosto dushwar hai kyon

aaj insan KHud insan se bezar hai kyon

aaj ke daur ne ye kaun si karwaT li hai

aaj ke daur mein masum gunahgar hai kyon

be-gunahon ka lahu shahr mein arzan hi sahi

aasman par bhi wahi rang numudar hai kyon

main to mar jaane ko tayyar hun dushman ke liye

mera dushman bhi magar marne ko tayyar hai kyon

kya tere kuche hi ki den tarahdari hai

tere kuche se jo guzra wo tarah-dar hai kyon

pahle barson mein bhi sunne ko na milta tha ye nam

aaj honTon pe har ek ke rasan-o-dar hai kyon

kya hum is daur ko shubhat ka ek daur kahen

shak mein Duba hua har shaKHs ka kirdar hai kyon

kyon KHulus aur sadaqat se nahin kuchh hasil

makr hi makr zamane ko saza-war hai kyon

tere maiKHane ke faizan-o-karam sab taslim

tere maiKHane ka har jam nigun-sar hai kyon

kal tak us shoKH ki yaadon pe tha jine ka madar

aaj us shoKH ki har yaad giran-bar hai kyon

gosha-e-dil mein bhi but-KHane hua karte hain

'qadir' is baat se ab aap ko inkar hai kyon