pyar ka dard ka mazhab nahin hota koi

pyaar kā dard kā maz.hab nahīñ hotā koī

ka.aba-o-dair se matlab nahīñ hotā koī

sach to ye hai ki maiñ har bazm meñ tanhā hī rahā

yuuñ magar paas mire kab nahīñ hotā koī

jān-o-īmāñ sahī sab kuchh sahī tū mere liye

haa.e kis muñh se kahūñ sab nahīñ hotā koī

ek saaya thā jise maiñ ne pakaḌnā chāhā

vo jo hotā thā koī ab nahīñ hotā koī

chāñdnī phuul havā jaam sitāre ḳhushbū

zahr ke naam haiñ jis shab nahīñ hotā koī

mujh ko ḳhud mujh se bhī milne nahīñ detī duniyā

chhup ke miltā huuñ kabhī jab nahīñ hotā koī

jis ko mil jaa.e ye daulat ho mubārak us ko

she'r sab ke liye mansab nahīñ hotā koī

pyar ka dard ka mazhab nahin hota koi

kaba-o-dair se matlab nahin hota koi

sach to ye hai ki main har bazm mein tanha hi raha

yun magar pas mere kab nahin hota koi

jaan-o-iman sahi sab kuchh sahi tu mere liye

hae kis munh se kahun sab nahin hota koi

ek saya tha jise main ne pakaDna chaha

wo jo hota tha koi ab nahin hota koi

chandni phul hawa jam sitare KHushbu

zahr ke nam hain jis shab nahin hota koi

mujh ko KHud mujh se bhi milne nahin deti duniya

chhup ke milta hun kabhi jab nahin hota koi

jis ko mil jae ye daulat ho mubarak us ko

she'r sab ke liye mansab nahin hota koi